ناندیڑ میں سائبر سکیورٹی سے متعلق بیداری پروگرام

ناندیڑ: 5 اکتوبر(نمائندہ اعتبار) قومی سائبر سکیورٹی بیداری ماہ کے تحت ناندیڑ ضلع پولیس کی جانب سے ایم جی ایم انجینئرنگ کالج، ناندیڑ میں طلبہ کے لیے خصوصی سائبر سکیورٹی بیداری پروگرام کا انعقاد کیا گیا۔ پروگرام میں پولیس سپرنٹنڈنٹ ناندیڑ ڈاکٹر نیلابھ روہن نے طلبہ کو بڑھتے ہوئے سائبر جرائم، آن لائن فراڈ کے مختلف طریقوں اور ان سے محفوظ رہنے کے لیے ضروری احتیاطی تدابیر سے آگاہ کیا۔ پروگرام کے دوران طلبہ کو خبردار کیا گیا کہ وہ کسی بھی نامعلوم شخص کے ساتھ OTP، PIN، CVV، پاس ورڈ، بینک اکاؤنٹ یا دیگر ذاتی معلومات ہرگز شیئر نہ کریں۔ اسی طرح نامعلوم افراد کی جانب سے موصول ہونے والی فون کالز، SMS، ای میلز اور مشتبہ لنکس سے محتاط رہنے اور کسی بھی مشکوک لنک پر کلک نہ کرنے کی ہدایت دی گئی۔ پولیس کی جانب سے KYC اپ ڈیٹ کے نام پر ہونے والے فراڈ، جعلی Digital Arrest، آن لائن مالیاتی دھوکہ دہی، UPI فراڈ، QR Code کے ذریعے ہونے والی جعل سازی، Fake Call اور Social Media Fraud سمیت سائبر جرائم کی مختلف شکلوں کے بارے میں بھی تفصیلی رہنمائی فراہم کی گئی۔ طلبہ کو اپنے Social Media اکاؤنٹس کی سکیورٹی مزید مضبوط رکھنے کا مشورہ دیا گیا۔ پولیس نے واضح کیا کہ سائبر فراڈ کا شکار ہونے کی صورت میں گھبرانے کے بجائے فوری طور پر سائبر کرائم ہیلپ لائن نمبر 1930 پر رابطہ کیا جائے اور www.cybercrime.gov.in پر شکایت درج کرائی جائے۔ پروگرام میں کالج کے صدر، پرنسپل، اساتذہ اور تقریباً 300 طلبہ نے شرکت کی۔ طلبہ نے سائبر سکیورٹی سے متعلق مختلف سوالات پوچھ کر ماہرین سے معلومات حاصل کیں۔ قومی سائبر سکیورٹی بیداری ماہ کے موقع پر ناندیڑ پولیس کی جانب سے طلبہ، تعلیمی اداروں اور عام شہریوں میں سائبر جرائم سے متعلق شعور پیدا کرنے کے لیے مختلف بیداری پروگرام منعقد کیے جا رہے ہیں۔ پولیس سپرنٹنڈنٹ ڈاکٹر نیلابھ روہن نے اپنے پیغام میں کہا کہ سائبر سکیورٹی ہر فرد کی ذمہ داری ہے اور احتیاط و بیداری ہی سائبر جرائم سے بچاؤ کا بہترین راستہ ہے۔