ناندیڑ میونسپل کارپوریشن میں سٹی ٹاسک فورس کمیٹی کا اجلاس منعقد

ناندیڑ: 23 جون(نمائندہ اعتبار) ’’صفر شرحِ اطفال اموات کے ہدف اور پولیو سے پاک بھارت کے عزم‘‘ کو برقرار رکھنے کے لیے ناندیڑ واگھالہ شہر میونسپل کارپوریشن حدود میں آئندہ اتوار 28 جون 2026ء کو قومی پلس پولیو ٹیکہ کاری مہم چلائی جائے گی۔ اسی طرح ’’اسٹاپ ڈائریا کیمپین‘‘ (اسہال کنٹرول پندرہ روزہ مہم) کو شہر میں مؤثر انداز میں نافذ کرنے کے مقصد سے ناندیڑ واگھالہ شہر میونسپل کارپوریشن کی سٹی ٹاسک فورس کی خصوصی جائزہ میٹنگ 23 جون 2026ء کو میونسپل کارپوریشن کی اسٹینڈنگ کمیٹی کے اجلاس ہال میں منعقد ہوئی۔ اس اجلاس میں میئر محترمہ کویتا سنتوش مولے اور میونسپل کمشنر ڈاکٹر مہیش کمار ڈوئی پھوڑے نے محکمۂ صحت کی تیاریوں کا تفصیلی جائزہ لیا اور متعلقہ آفیسران کو اہم ہدایات جاری کیں۔قومی پلس پولیو مہم ملک بھر کے ساتھ ناندیڑ شہر میں بھی 28 جون کو منعقد کی جائے گی۔ اس موقع پر 0 تا 5 سال عمر کے کسی بھی بچے کو پولیو خوراک سے محروم نہ رہنے دینے کی سخت ہدایت دی گئی ہے۔ اس قومی مہم کے تحت ناندیڑ میونسپل کارپوریشن حدود میں 5 سال سے کم عمر کے 92,845 بچوں کو پولیو سے بچاؤ کی خوراک پلانے کا ہدف مقرر کیا گیا ہے۔ اس مقصد کے لیے شہر بھر میں 285 پولیو بوتھ قائم کیے گئے ہیں۔ اس کے علاوہ سفر میں مصروف یا دور دراز علاقوں میں رہنے والے بچوں تک پہنچنے کے لیے 63 خصوصی ٹرانزٹ ٹیمیں تشکیل دی گئی ہیں۔ مہم کے پہلے دن (28 جون) بوتھ تک نہ پہنچنے والے بچوں کے لیے بعد کے دنوں میں گھر گھر جاکر پولیو خوراک پلائی جائے گی۔ اس کام کے لیے 180 آئی پی پی آئی (IPPI) ٹیموں کے صحت کارکنان، آنگن واڑی کارکنان اور آشا رضاکار گھر گھر جاکر محروم رہ جانے والے بچوں کو پولیو کے قطرے پلائیں گے۔ اسی طرح ریلوے اسٹیشن، بس اسٹینڈ، بازاروں اور اہم چوراہوں پر ٹیکہ کاری کے لیے 13 موبائل ٹیمیں بھی تعینات کی جائیں گی۔اسی طرح ’’اسٹاپ ڈائریا کیمپین‘‘ (اسہال کنٹرول مہم) کے تحت بچوں میں پانی کی کمی کے باعث ہونے والی اموات کی روک تھام کے لیے شہر میں اسہال کنٹرول پندرہ روزہ مہم مؤثر طریقے سے چلائی جائے گی۔ اس مہم کے دوران آشا رضاکاروں کے ذریعے 5 سال سے کم عمر بچوں کے گھروں میں او آر ایس (ORS) کے پیکٹ اور زنک گولیوں کی پیشگی تقسیم کی جائے گی۔ شہر کی جھونپڑ پٹّیوں، ہائی رسک علاقوں، تعمیراتی مقامات اور مہاجر آبادیوں پر خصوصی توجہ مرکوز کرتے ہوئے مائیکرو پلان تیار کیا گیا ہے۔ میونسپل کارپوریشن کے تمام شہری صحت مراکز، اسپتالوں اور او پی ڈی میں ’’او آر ایس-زنک کارنرز‘‘ قائم کیے جائیں گے۔ اس کے علاوہ صاف پینے کے پانی، صفائی ستھرائی اور ہاتھ دھونے کی درست عادات کے بارے میں اسکولوں، آنگن واڑی مراکز اور عوامی مقامات پر بڑے پیمانے پر بیداری مہم چلائی جائے گی۔
میئر اور کمشنر کی اپیل:
اجلاس سے خطاب کرتے ہوئے میئر محترمہ کویتا سنتوش مولے نے کہا کہ پولیو کے مکمل خاتمے کی کامیابی برقرار رکھنے کے لیے انتظامیہ اس بات کو یقینی بنائے کہ شہر کا کوئی بھی بچہ ٹیکہ کاری سے محروم نہ رہے۔ میونسپل کمشنر ڈاکٹر مہیش کمار ڈوئی پھوڑے نے واضح کیا کہ اگرچہ بچوں نے معمول کی ٹیکہ کاری کے تمام پولیو ڈوز حاصل کیے ہوں، پھر بھی قومی پلس پولیو مہم کے تحت اضافی خوراک دینا ان کی صحت کے لیے نہایت ضروری ہے۔ لہٰذا تمام شہری، سماجی تنظیمیں اور والدین 28 جون کو اپنے 5 سال سے کم عمر ہر بچے کو قریبی پولیو مرکز لے جا کر لازمی پولیو خوراک پلوائیں اور اسہال کنٹرول مہم میں تعاون کرتے ہوئے شہر کو اطفال اموات سے پاک اور صحت مند بنانے میں اپنا کردار ادا کریں۔اس اجلاس میں ایڈیشنل کمشنر نیلیش سنکیوار، ڈپٹی کمشنر سردار اجیت پال سنگھ سندھو، چیف میڈیکل آفیسر ڈاکٹر ہنومنت رٹھے، تمام میڈیکل آفیسران، ایجوکیشن آفیسر پروینا ماندلے، ہیلتھ انسپکٹرس اور ٹاسک فورس کمیٹی کے ارکان موجود تھے۔