ناندیڑ: میونسپل کارپوریشن کی جانب سے پلس پولیو ٹیکہ کاری مہم کا آغاز

ناندیڑ: 28؍جون(نمائندہ اعتبار) ناندیڑ شہر میونسپل کارپوریشن کی جانب سے 5 سال سے کم عمر کے تمام بچوں کے لیے پلس پولیو ٹیکہ کاری مہم کا افتتاح میونسپل کارپوریشن کے جنگم واڑی واقع ہیلتھ سینٹر میں انجام دیا گیا۔ شہر کا کوئی بھی بچہ پولیو کے قطروں سے محروم نہ رہے، اس مقصد کے تحت ناندیڑ کی میئر محترمہ کویتا سنتوش مُلے نے تمام شہریوں سے اپیل کی ہے کہ وہ اپنے بچوں کو لازماً پولیو کے قطرے پلوائیں۔ اس موقع پر نائب میئر دیپک سنگھ راوت بھی بطورِ خاص موجود تھے۔اس مہم کے تحت پیدائش سے لے کر 5 سال تک کی عمر کے تمام بچوں کو پولیو کے ’’دو قطرے‘‘ پلانا ضروری ہے۔ پولیو سے پاک بھارت کے خواب کو حقیقت میں بدلنے کے لیے والدین سے اپیل کی گئی ہے کہ وہ خود آگے بڑھ کر اپنے بچوں کو پولیو کے قطرے ضرور دلوائیں۔شہر کے تمام سرکاری اسپتالوں، بنیادی مراکزِ صحت اور آنگن واڑی مراکز میں پولیو کے قطرے دستیاب ہیں۔ اس کے علاوہ بس اسٹینڈ، ریلوے اسٹیشن اور اہم چوراہوں پر بھی خصوصی بوتھ قائم کیے گئے ہیں۔ مہم کے پہلے دن اگر کوئی بچہ رہ جائے تو آئندہ دنوں میں محکمۂ صحت کے ملازمین گھر گھر جاکر ایسے بچوں کو پولیو کے قطرے پلائیں گے۔پولیو ایک انتہائی خطرناک بیماری ہے اور اس کا مکمل خاتمہ صرف باقاعدہ ٹیکہ کاری کے ذریعے ہی ممکن ہے۔ اس لیے اپنے گھر اور محلے کے 5 سال سے کم عمر ہر بچے کو قریبی پولیو مرکز لے جاکر پولیو کے قطرے ضرور دلوائیں۔ یہ اپیل میئر محترمہ کویتا سنتوش مُلے اور میونسپل کارپوریشن انتظامیہ کی جانب سے کی گئی ہے۔اس موقع پر خواتین و اطفال بہبود کمیٹی کی صدر سدیچھا سونی پاٹل، صحت ذیلی کمیٹی کے صدر ڈاکٹر انکوش دیوسرکر، ایڈیشنل کمشنر نیلیش سوکیوار، ڈپٹی کمشنر ایس۔ اجیت پال سنگھ سندھو، میڈیکل ہیلتھ آفیسر ڈاکٹر ہنومنت رٹھے، امیونائزیشن آفیسر ڈاکٹر بالا پرساد کنٹورکر، شہری تپِ دق آفیسر ڈاکٹر محمد بدیع الدین سمیت دیگر معززین موجود تھے۔آج 28؍جون کو میونسپل کارپوریشن حدود کے تمام پولیو مراکز پر 5 سال سے کم عمر بچوں کو پولیو کے قطرے پلائے گئے، جبکہ آئندہ 5 دنوں تک محکمۂ صحت کے ملازمین گھر گھر جاکر بچوں کو پولیو کے قطرے پلانے کی مہم جاری رکھیں گے۔ یہ اطلاع ڈپٹی کمشنر ایس۔ اجیت پال سنگھ سندھو نے دی۔