پربھنی ضلع کے طلبہ پریشان نہ ہوں!

پربھنی :7؍فروری (ضلع نامہ نگار: اعتبار نیوز محمد سرور شریف):ایس ایس سی بورڈ کی جانب سے دسویں اور بارہویں جماعت کے امتحانات دینے والے طلبہ کے لیے ایک اہم اور راحت بخش اقدام کے تحت ماہر کونسلرز کا تقرر کیا گیا ہے، تاکہ امتحانات کے دوران طلبہ کو ذہنی دباؤ، خوف اور الجھنوں سے نجات دلائی جا سکے۔امتحانات کا دورانیہ طلبہ اور والدین دونوں کے لیے ایک حساس مرحلہ ہوتا ہے۔ پڑھائی کا دباؤ، امتحان کا خوف، وقت کی منصوبہ بندی، توقعات کا بوجھ اور خود اعتمادی کی کمی کے باعث بہت سے طلبہ بے چینی اور تناؤ کا شکار ہو جاتے ہیں۔ ان تمام مسائل کو مدنظر رکھتے ہوئے تعلیمی بورڈ نے یہ فیصلہ کیا ہے کہ طلبہ کو مفت مشاورتی رہنمائی فراہم کی جائے۔بورڈ کی جانب سے قائم کیے گئے اس مشاورتی نظام کا مقصد طلبہ کو تناؤ سے پاک ماحول میں امتحانات کی تیاری کے قابل بنانا ہے۔ کونسلرز طلبہ کو مطالعہ کے مؤثر طریقے، وقت کا درست استعمال، امتحان کے خوف میں کمی، خود اعتمادی میں اضافہ اور مثبت ذہنیت اپنانے سے متعلق رہنمائی فراہم کریں گے۔ایس ایس سی بورڈ نے طلبہ کے لیے واضح پیغام دیا ہے کہ ’’ٹینشن نہ لیں‘‘ اور ضرورت محسوس ہونے پر کونسلرز سے رہنمائی حاصل کریں۔ بورڈ کا ماننا ہے کہ ماہر مشیروں سے بروقت رہنمائی لینے سے نہ صرف ذہنی دباؤ کم ہوگا بلکہ امتحانی کارکردگی میں بھی نمایاں بہتری آئے گی۔
ماہر کونسلرسے رابطہ کی تفصیل:
امیر خان سر: 9860444986
واضح رہے کہ بارہویں جماعت کے امتحانات 10 فروری 2026 سے جبکہ دسویں جماعت کے امتحانات 20 فروری 2026 سے شروع ہو رہے ہیں۔ اس پس منظر میں ماہر کونسلرز طلبہ کی مختلف تعلیمی اور ذہنی امور پر رہنمائی کریں گے۔
ماہرین کا کہنا ہے کہ امتحانات کے دوران پرسکون ذہن، منصوبہ بند مطالعہ، شیڈول کے مطابق پڑھائی اور باقاعدہ آرام نہایت ضروری ہے۔ اسی اصول کو اپناتے ہوئے طلبہ بہتر نتائج حاصل کر سکتے ہیں۔