ڈاکٹر شنکرراو چوہان سرکاری میڈیکل کالج و اسپتال، وشنوپوری میں جدید اور اعلیٰ صلاحیت والی سی ٹی اسکین مشین نئی طور پر شروع کر دی گئی

ناندیڑ:19؍دسمبر(نمائندہ اعتبار) ڈاکٹر شنکرراو چوہان سرکاری میڈیکل کالج و اسپتال، وشنوپوری کے ایکس رے (ریڈیالوجی) شعبہ میں جدید ترین اور اعلیٰ صلاحیت کی Siemens 128 Slice سی ٹی اسکین مشین کو نئی طور پر فعال کیا گیا ہے۔ اس جدید طبی سہولت کا 17؍دسمبر کو ضلع کلکٹر راہل کرڈیلے نے خود موقع پر پہنچ کر جائزہ لیا۔یہ Siemens 128 Slice سی ٹی اسکین مشین انتہائی تیز، درست اور ہائی ریزولوشن تصاویر فراہم کرنے والی ہے اور کم وقت میں پورے جسم کا معائنہ کرنے کی صلاحیت رکھتی ہے۔ اس مشین کی مدد سے دماغی امراض، فالج، دماغ میں خون بہنا، دل اور خون کی نالیوں کی بیماریاں، حادثات میں ہونے والی اندرونی چوٹیں نیز سینہ اور پیٹ کے سنگین و پیچیدہ امراض کی فوری اور درست تشخیص ممکن ہو سکے گی۔ورچوئل برونکوسکوپی کی سہولت کے ذریعے پھیپھڑوں کے اندر موجود گلٹیوں کی درست تشخیص کی جا سکتی ہے۔ اسی کے ساتھ جسم کے مختلف حصوں میں موجود گلٹیوں کی بایوپسی کی سہولت بھی دستیاب ہے۔ غذائی نالی کے امراض کی تشخیص کے لیے ڈائنامک اورل کانٹراسٹ اسٹڈی کی جانچ کی جاتی ہے، جس سے متعلقہ بیماریوں کی درست تشخیص میں مدد ملتی ہے۔فالج کے مریضوں میں گردن اور دماغ کی خون کی نالیوں کا معائنہ بھی اس مشین کے ذریعے ممکن ہے۔ حادثے کے شکار مریضوں کے پورے جسم کا سی ٹی اسکین کیے جانے کے باعث کم سے کم وقت میں درست تشخیص کر کے فوری اور مؤثر علاج فراہم کیا جا سکتا ہے۔ اسی طرح ریڑھ کی ہڈی سے متعلق مختلف بیماریوں کی تشخیص بھی اس مشین پر ممکن ہے۔ اس مشین کے ذریعے خواتین مریضوں کے رحم اور دیگر اعضاء کے مختلف امراض کی درست تشخیص کی جاتی ہے، جبکہ بچوں میں پائے جانے والے مہلک امراض کی تشخیص بھی اس جدید مشین کے ذریعہ ممکن ہو گئی ہے۔اس سی ٹی اسکین مشین کی نمایاں خصوصیات میں انتہائی کم وقت میں (ہائی اسپیڈ اسکیننگ) جانچ مکمل ہونا، کم شعاعی اخراج (Low Radiation Dose) کے ساتھ اعلیٰ معیار کا اسکین، 3D اور 4D امیجنگ کی بدولت زیادہ درست تشخیص، دماغ، دل، پھیپھڑوں، پیٹ اور پورے جسم کا تفصیلی معائنہ، حادثہ زدہ مریضوں کے لیے فوری فل باڈی سی ٹی اسکین، دل کی خون کی نالیوں کی (CT Coronary Angiography) درست جانچ، نیز بچوں اور بزرگ مریضوں کے لیے محفوظ جانچ کا انتظام شامل ہے۔ اس جدید سہولت سے علاج کے عمل میں آسانی پیدا ہوگی، وقت کی بڑی بچت ہوگی اور سنگین مریضوں کی فوری و درست تشخیص ممکن ہو سکے گی۔ناندیڑ ضلع میں اس نوعیت کی اعلیٰ صلاحیت والی Siemens 128 Slice سی ٹی اسکین مشین واحد طور پر ڈاکٹر شنکرراو چوہان سرکاری میڈیکل کالج و اسپتال، وشنوپوری، ناندیڑ میں دستیاب ہوئی ہے، جس کا براہِ راست فائدہ ضلع اور اطراف کے ہزاروں مریضوں کو ہوگا۔معائنے کے دوران ضلع کلکٹر راہل کرڈیلے نے اسپتال کی مجموعی صفائی اور روزمرہ کے انتظامات پر اطمینان کا اظہار کرتے ہوئے اسپتال انتظامیہ کے کام کی ستائش کی۔اس موقع پر ڈین ڈاکٹر سدھیر دیشمکھ، میڈیکل سپرنٹنڈنٹ ڈاکٹر وجے کمار کاپسے، شعبہ ایکس رے کے سربراہ ڈاکٹر امیت پنچمہالکر، ریڈیالوجی کے پروفیسر ڈاکٹر انیل تاپڈیا، مائیکرو بایولوجی کے پروفیسر ڈاکٹر ایس آر مورے، اینستھیزیا شعبہ کی پروفیسر ڈاکٹر ویشنوِی کلکرنی، شعبہ اطفال کے پروفیسر ڈاکٹر کشور راٹھوڑ، فارماکولوجی کے پروفیسر ڈاکٹر کانتی لال چندالیا، ڈاکٹر کپل مورے، ڈاکٹر عبید خان، اسوسی ایٹ پروفیسر (میڈیسن) و ڈپٹی میڈیکل سپرنٹنڈنٹ ڈاکٹر اجے ورادے، خوشال وشواسراو، سنجے واکڑے، انتظامی آفیسر، ریزیڈنٹ میڈیکل آفیسر ڈاکٹر نکھل گھوگے، ڈاکٹر دھننجے مورے، محترمہ الکنندا کلکرنی (اسسٹنٹ نرسنگ آفیسر)، ستیش انگلے (لائبریرین) سمیت میڈیکل کالج اور اسپتال کے مختلف شعبہ جات کے افسران اور ملازمین موجود تھے۔