سرگرم سماجی کارکن عبدالرحیم پٹیل نے زون نمبر 11 سے اُمیدواری داخل کی

ناندیڑ:14؍دسمبر ( نمائندہ اعتبار) ناندیڑ واگھالہ شہر میونسپل کارپوریشن کے عام انتخابات کے مدنظر سرگرم سماجی کارکن عبدالرحیم پٹیل نے زون نمبر 11 (اوپن زمرے) سے مجلس اتحادالمسلمین کے ٹکٹ کے حصول کے لیے آج اپنی دعویداری مجلس کے دفتر میں سابق ریاستی صدر سید معین، ضلع صدر مرزا امجد بیگ کے روبرو پیش کی۔ ان کے ہمراہ قیصر بھائی، ریاض بھائی،ساجد بھائی، سعید بھائی، انور بھائی کے علاوہ بڑی تعداد میں محبان و کارکنان اور علاقہ کے عوام موجود تھے۔ واضح رہے کہ عبدالرحیم پٹیل شہر کے متحرک و فعال اور بیدار سماجی کارکنوں میں شمار کیے جاتے ہیں، جو عوامی مسائل کے حل کے لیے ہمیشہ پیش پیش رہتے ہیں۔ وہ صفائی، حفظان صحت، تعلیم اور دیگر بلدیاتی سہولیات کے بارے میں مسلسل نگرانی کرتے ہوئے انتظامیہ کو بروقت اطلاع دینے کا فریضہ انجام دیتے رہے ہیں۔ ان کی سماجی خدمات کو عوامی حلقوں میں سراہا جاتا ہے اور ان کی کوششوں کے نتیجے میں کئی بلدیاتی مسائل حل ہوئے ہیں۔ جس کے پیش نظر اُن کو پارٹی کا ٹکٹ ملنا یقینی سمجھا جارہا ہے۔