الصفہ انٹرنیشنل اسکول اور شاہین انٹرنیشنل اسکول میں استقبالِ رمضان پروگرام کا شاندار انعقاد

ناندیڑ:3؍مارچ (راست) الصفہ گروپ، ناندیڑ کے دونوں معروف تعلیمی اداروں، الصفہ انٹرنیشنل اسکول اور شاہین انٹرنیشنل اسکول میں استقبالِ رمضان کے روح پرور پروگرام کا انعقاد کیا گیا۔ اس بابرکت موقع پر جماعت دوم تا دہم کے طلبہ نے رمضان المبارک کی فضیلت پر مدلل اور پُراثر تقاریر پیش کیں۔طلبہ نے اپنے اساتذہ کی رہنمائی میں بہترین انداز میں رمضان کی برکات، اس کی عبادات، اور تقویٰ کی اہمیت پر روشنی ڈالی۔ اساتذہ نے بھی اس موقع پر طلبہ کی حوصلہ افزائی کرتے ہوئے رمضان کے لئے ایک منظم ٹائم ٹیبل بنانے کی ہدایت دی۔ اس کے علاوہ، نمازوں کی پابندی، قرآن کی تلاوت معہ ترجمہ و تفسیر، دعاؤں اور اذکار کی کثرت، اور صدقات و خیرات کی اہمیت پر زور دیا گیا۔پروگرام کے اختتام پر ایک معصوم طالب علم کی دلگیر دعا نے حاضرین کے دلوں کو روحانی سکون عطا کیا۔ اس موقع پر اسکول انتظامیہ نے طلبہ کے جوش و خروش کو سراہا اور انہیں رمضان المبارک کی برکات سے مکمل استفادہ کرنے کی ترغیب دی۔