ناندیڑ میں غیر قانونی طور پر منتقل کیے جا رہے 7 گئو ونش برآمد، 10.05 لاکھ روپے کا مال ضبط

ناندیڑ: 24 ؍اگست(نمائندہ اعتبار) ناندیڑ ضلع میں گئو ونش کی غیر قانونی نقل و حمل اور جانوروں پر ظلم کے خلاف جاری خصوصی مہم کے تحت لوکل کرائم برانچ، ناندیڑ نے بڑی کارروائی کرتے ہوئے ایک مہندرا بولیرو پک اَپ سے 7 گئو ونش برآمد کیے۔ پولیس کے مطابق پولیس نے جانوروں کو مبینہ طور پر ذبح کے مقصد سے انتہائی تنگ اور بے رحمانہ طریقے سے منتقل کیے جانے کا معاملہ سامنے آنے کے بعد پک اَپ سمیت مجموعی طور پر تقریباً 10 لاکھ 5 ہزار روپئے مالیت کا مال ضبط کیا ہے۔ پولیس کے مطابق 24 ؍اگست کی علی الصبح لوکل کرائم برانچ کو خفیہ اطلاع ملی تھی کہ سفید رنگ کی مہندرا بولیرو پک اَپ کے ذریعے گئو ونش کی غیر قانونی نقل و حمل کی جا رہی ہے۔ اطلاع کی بنیاد پر پولیس ٹیم نے جال بچھا کر مہندرا بولیرو پک اَپ نمبر MH-04-JU-8210 کو روکا۔ پنچوں کی موجودگی میں گاڑی کی تلاشی لینے پر اس میں رسیوں سے باندھے گئے 7 گئو ونش برآمد ہوئے۔ پولیس نے برآمد شدہ 7 گئو ونش کی تخمینی مالیت 7 لاکھ روپئے جبکہ مہندرا بولیرو پک اَپ کی مالیت تقریباً 3 لاکھ 5 ہزار روپئے بتائی ہے۔ اس طرح ضبط کیے گئے کل مال کی تخمینی مالیت 10 لاکھ 5 ہزار روپئے ہے۔ اس معاملے میں نئی آبادی، اردھاپور کےساکن شیخ شاہد شیخ محبوب اور شعیب اختر عبدالرزاق کے خلاف مقدمہ درج کیا گیا ہے، تاہم شعیب اختر عبدالرزاق فرار ہے۔ ملزمان کے خلاف مہاراشٹر جانور تحفظ قانون کی متعلقہ دفعات 5(الف)، 5(ب)، 9(الف)، 9(ب) اور بھارتیہ نیائے سنہتا کی دفعہ 3(5) کے تحت کارروائی کی گئی ہے۔ یہ کارروائی ناندیڑ کے پولیس سپرنٹنڈنٹ ڈاکٹر نیلابھ روہن کے احکامات پر، ایڈیشنل پولیس سپرنٹنڈنٹ بھوکر ارچنا پاٹل، ایڈیشنل پولیس سپرنٹنڈنٹ ناندیڑ سورج گورَو اور پولیس انسپکٹر اتل بھوسلے کی رہنمائی میں انجام دی گئی۔ پولیس سب انسپکٹر مادھو کَیندر، پولیس سب انسپکٹر بلیرام داسرے اور لوکل کرائم برانچ کے اہلکاروں سمیت ناندیڑ دیہی پولیس کے بیٹ مارشل مپڑے اور کدم نے کارروائی میں حصہ لیا۔