آنجہانی اجیت دادا پوار کے نام سے ’اقلیتی دوست ایوارڈ‘ شروع کرنے کا مطالبہ

ممبئی:30؍اکتوبر(راست)مہاراشٹر کے سابق نائب وزیر اعلیٰ آنجہانی اجیت دادا پوار کی یادوں کو محفوظ رکھنے اور اقلیتی طبقے کی سماجی، تعلیمی اور معاشی ترقی کے لیے نمایاں خدمات انجام دینے والی شخصیات اور اداروں کی حوصلہ افزائی کے مقصد سے مہاراشٹر حکومت کی جانب سے ’’آنجہانی اجیت دادا پوار اقلیتی دوست ایوارڈ‘‘ شروع کرنے کا مطالبہ کیا گیا ہے۔وقف انسٹی ٹیوشنز فیڈریشن کے بانی صدر غوث بھائی شِرولکر نے اس سلسلے میں مہاراشٹر کی نائب وزیر اعلیٰ اور وزیر برائے اقلیتی ترقی و اوقاف محترمہ سنیتراتائی اجیت دادا پوار کو ایک تحریری مکتوب پیش کیا ہے۔مکتوب میں کہا گیا ہے کہ آنجہانی اجیت دادا پوار نے مہاراشٹر کی عوامی زندگی میں مختلف اہم ذمہ داریاں نبھاتے ہوئے سماج کے تمام طبقات کی ترقی کے لیے نمایاں کردار ادا کیا۔ ان کی یاد میں اس ایوارڈ کا آغاز اقلیتی طبقے کی ہمہ جہت ترقی کے لیے کام کرنے والی شخصیات اور اداروں کو سرکاری سطح پر اعزاز دینے اور ان کی خدمات کی حوصلہ افزائی کرنے کی جانب ایک اہم قدم ثابت ہو سکتا ہے۔اس مجوزہ ایوارڈ کے تحت تعلیم، روزگار، خواتین اور نوجوانوں کو بااختیار بنانے، سماجی خدمات، صحت، ہنرمندی کی ترقی، سماجی ہم آہنگی اور تعلیمی اداروں کی ترقی کے لیے قابلِ ذکر خدمات انجام دینے والے افراد اور اداروں کو اعزاز سے نوازا جا سکتا ہے۔ اس کے علاوہ حکومت کی مختلف فلاحی اسکیموں کے فوائد ضرورت مند اقلیتی طبقات تک پہنچانے کے لیے کام کرنے والے سماجی کارکنوں کی بھی حوصلہ افزائی کی جا سکے گی۔غوث بھائی شِرولکر نے مطالبہ کیا ہے کہ اس ایوارڈ کے لیے ضروری قواعد و ضوابط وضع کیے جائیں، انتخاب کا شفاف طریقۂ کار مقرر کیا جائے اور مہاراشٹر حکومت کی جانب سے ایوارڈ شروع کرنے کے سلسلے میں مثبت فیصلہ لیا جائے۔انہوں نے اپنے مطالبے میں اس امید کا اظہار کیا کہ اس اقدام سے اقلیتی طبقے کی ترقی کے لیے کام کرنے والے افراد اور اداروں کو سرکاری سطح پر شناخت ملے گی اور آنجہانی اجیت دادا پوار کے سماجی ترقی کے وژن سے وابستہ ترغیب آنے والی نسلوں تک پہنچ سکے گی۔