ناندیڑ میں عید میلادالنبیﷺ کا عظیم الشان جلوس

ناندیڑ: 26؍اگست (نمائندہ اعتبار) عید میلادالنبیﷺ کے موقع پر ناندیڑ شہر میں بدھ کے روز مرکزی میلاد کمیٹی ناندیڑ کی جانب سے علمائے اہلِ سنت کی سرپرستی میں عظیم الشان جلوسِ میلاد کا انعقاد کیا گیا، جس میں ہزاروں کی تعداد میں مسلمانوں نے شرکت کی۔ جلوس نہایت جوش و خروش، مذہبی عقیدت اور نظم و ضبط کے ساتھ مختلف راستوں سے گزرتا ہوا حضرت مستان شاہ ولیؒ کے درگاہ پر پہنچ کر اختتام پذیر ہوا۔ جلوس کا آغاز صبح 9:45بجے نظامی کالونی سے ہوا۔ جلوس روانہ ہونے سے قبل مسجدِ نظامی کالونی میں واقع مسجدِ خواجگان میں موجود نظامی صوفی بزرگ کے مزار پر سلام و دعا کی گئی۔ اس موقع پر ناندیڑ ضلع کے پولیس سپرنٹنڈنٹ نیلابھ روہن، ایڈیشنل پولیس سپرنٹنڈنٹ سورج گرو اور پولیس انتظامیہ کے دیگر افسران نے علمائے اہلِ سنت اور مرکزی میلاد کمیٹی کے عہدیداران کا استقبال و تہنیت کی، جس کے بعد جلوس باقاعدہ طور پر روانہ ہوا۔جلوس نظامی کالونی سے آئی ٹی آئی، شیواجی نگر، کلا مندر، سرکاری اسپتال، مہاویر چوک، گردوارہ چوک، قدیم مونڈھا اور مہاتما گاندھی روڈ سے ہوتا ہوا محمد علی روڈ کے راستے حضرت مستان شاہ ولیؒ کے درگاہ پہنچا۔ جلوس کے دوران راستے میں مختلف مقامات پر بارش نے موسم کو خوش گوار بنا دیا اور بارش کی پھوار نے جلوس میں شریک تھکے ہوئے عاشقانِ رسولﷺ کو تازگی عطا کی۔جلوس میں شریک افراد درود و سلام اور صلوٰۃ و سلام کا ورد کرتے ہوئے چل رہے تھے۔ شرکاء کی جانب سے مذہبی نعرے بھی بلند کیے جا رہے تھے۔ بڑی تعداد میں بچے سبز پرچم ہاتھوں میں لیے نہایت جوش و خروش کے ساتھ جلوس میں شریک ہوئے۔ علمائے اہلِ سنت جلوس کے سب سے آگے دو گھوڑوں کے ہمراہ چل رہے تھے۔ راستے میں مختلف مقامات پر لوگوں نے علماء کا پھولوں کے ہار اور شال پیش کرکے استقبال کیا۔جلوس کے راستے میں ہندو مسلم سماج کے سماجی کارکنوں، میونسپل کارپوریٹروں اور معزز شخصیات کی جانب سے شرکائے جلوس کے لیے شربت، بسکٹ اور پانی کی سبیلیں لگائی گئی تھیں۔ جلوس میں بچوں، نوجوانوں اور بزرگوں سمیت ہر عمر کے افراد نے بڑی تعداد میں شرکت کی، جس سے شہر میں عید میلادالنبیﷺ کی مناسبت سے عقیدت و محبت کا ماحول دیکھنے میں آیا۔حضرت مستان شاہ ولیؒ کے درگاہ پر پہنچنے کے بعد علمائے اہلِ سنت حضرت مولانا تراب الدین رضوی، مفتی منشاد رضوی، مفتی مرتضیٰ مصباحی اور دیگر علما نے قرآنِ کریم کی تلاوت، بیانات اور دعاؤں کا اہتمام کیا۔ علماء نے مسلمانوں سمیت شہر اور ملک کے تمام شہریوں کے لیے خصوصی دعائیں کیں۔ دعا میں ملک و شہر میں امن و امان، بھائی چارہ اور گنگا جمنی تہذیب کے فروغ و استحکام، نوجوانوں کو بری عادتوں سے محفوظ رکھنے اور خشک سالی سے متاثرہ علاقوں میں بارانِ رحمت کے نزول کی خصوصی دعا کی گئی۔اس موقع پر مرکزی میلاد کمیٹی کے عہدیداران نے جلوس کے کامیاب انعقاد میں تعاون کرنے پر پولیس انتظامیہ، میونسپل کارپوریشن کے متعلقہ افسران و ملازمین اور تمام معاونین کا شکریہ ادا کیا۔ ان تمام افراد کے لیے بھی خصوصی دعا کی گئی جنہوں نے جلوس کے انتظامات میں دن رات محنت کی اور اختتامی مقام پر شرکائے جلوس کے لیے کھانے کا انتظام کرنے میں تعاون کیا۔بعد ازاں حضرت مستان شاہ ولیؒکے درگاہ میں نمازِ ظہر ادا کی گئی۔ میلاد گراؤنڈ اور مسجد کے احاطے میں شرکائے جلوس کے لیے کھانے کا انتظام کیا گیا، جس کے بعد جلوس کے اختتام کا اعلان کیا گیا۔مرکزی میلاد کمیٹی کے صدر مجیب قادری، نائب صدر شیخ احمد، صوفی علی بابا، سکریٹری احمد نبی والا، جوائنٹ سکریٹری ایڈووکیٹ ایوب جاگیردار، شیخ دستگیر، خازن ایڈووکیٹ سلیم گیگانی، رفیق اشرفی والا، ایڈووکیٹ ضیاء الدین عبدالجبار، اسد قادری، پیر بھائی رضوی، شیر خان سمیت مرکزی میلاد کمیٹی کے دیگر عہدیداران اور اراکین نے جلوس کے کامیاب انعقاد کے لیے نمایاں خدمات انجام دیں۔اس طرح ناندیڑ شہر میں عید میلادالنبیﷺ کا جلوس مذہبی جوش و خروش، باہمی بھائی چارے اور نظم و ضبط کے ساتھ پُرامن طور پر اختتام پذیر ہوا۔