تلنگانہ پولیس پر حملہ کرنے والے ملزم کو گرفتار کرلیا گیا

کنوٹ: 31؍اگست (محمد اکرم چوہان)ایک مقدمے میں مفرور ملزم کو حراست میں لے کر جانے والی تلنگانہ پولیس کی ٹیم پر لاٹھیوں، ڈنڈوں اور پتھروں سے حملہ کرکے ملزم کو چھڑا کر لے جانے کا سنسنی خیز واقعہ کنوٹ۔ناندیڑ روڈ پر چکھلی پھاٹے کے قریب پیش آیا۔ اس معاملے میں کنوٹ پولیس نے گہری چھان بین کرتے ہوئے پیر کی صبح مفرور ملزم کو چکھلی گاؤں سے گرفتار کرلیا ہے۔ تھانے میں 50 سے 60 افراد کے ہجوم کے خلاف اقدامِ قتل سمیت مختلف سنگین دفعات کے تحت مقدمہ درج کیا گیا ہے۔تلنگانہ ریاست کے بازار ہاتنور پولیس اسٹیشن میں درج دھوکہ دہی کے مقدمے (جرم نمبر 173/2025) کے مفرور ملزم شیخ بکر عرف جعفر شیخ، ساکن چکھلی، تعلقہ کنوٹ، کے کنوٹ آنے کی اطلاع ملنے پر بازار ہاتنور پولیس اسٹیشن کے پولیس سب انسپکٹر رمیش پرشورام گوکلا اپنی ٹیم کے ہمراہ کنوٹ پہنچے تھے۔ پولیس نے ملزم شیخ بکر کو حراست میں لیا اور گاڑی کے ذریعے اسے تلنگانہ لے جایا جا رہا تھا۔30 اگست کو شام تقریباً 6:05 بجے چکھلی پھاٹے کے قریب ملزم کے بھائی شیخ سونو نے 50 سے 60 خواتین و مردوں کے ہجوم کے ساتھ ہاتھوں میں لاٹھیاں، ڈنڈے اور پتھر لے کر پولیس کی گاڑی کو روک لیا۔ خطرے کا احساس ہوتے ہی پولیس نے گاڑی واپس کنوٹ کی سمت موڑ لی، تاہم ہجوم نے تعاقب کرتے ہوئے گاڑی کو دوبارہ روک لیا۔ہجوم نے جان سے مارنے کی نیت سے پولیس گاڑی کے شیشے توڑ دیے۔ ملزمان نے پولیس سب انسپکٹر رمیش گوکلا کے سر پر ڈنڈے سے حملہ کیا، جبکہ ان کے ساتھ موجود پولیس اہلکاروں کو بھی لاتوں اور گھونسوں سے چہرے، پیٹھ اور سینے پر شدید مارا پیٹا۔ اس ہنگامے کا فائدہ اٹھاتے ہوئے ہجوم نے ملزم شیخ بکر کو پولیس کی حراست سے چھڑا لیا۔ اپنی حفاظت اور حالات پر قابو پانے کے لیے پولیس سب انسپکٹر گوکلا نے اپنی سروس پستول سے ہوا میں فائرنگ کی۔اس واقعے کے بعد 31 اگست 2026 کو رات 2:15 بجے کنوٹ پولیس اسٹیشن میں مقدمہ درج کیا گیا ہے (جرم نمبر 224/2026)۔ ملزمان کے خلاف بھارتیہ نیائے سنہیتا (BNS) کی دفعات 109 (اقدامِ قتل)، 121(1)، 132، 126(2)، 189، 190، 191(2)، 191(3)، 263، 324، 351(3) کے ساتھ فوجداری قانون ترمیمی ایکٹ 1932 کی دفعہ 7 کے تحت مقدمات درج کیے گئے ہیں۔واقعے کی اطلاع ملتے ہی بھوکر کی ایڈیشنل سپرنٹنڈنٹ آف پولیس ارچنا پاٹل، سب ڈویژنل پولیس آفیسر چندرشیکھر کدم اور پولیس انسپکٹر کراڑ نے موقع پر پہنچ کر معائنہ کیا۔ موصولہ اطلاع کی بنیاد پر کنوٹ پولیس نے پیر کی صبح شیخ بکر اور اس کے بھائی شیخ سونو کو چکھلی میں واقع ایک مکان سے گرفتار کرلیا۔ اس معاملے کی مزید تفتیش اسسٹنٹ پولیس انسپکٹر جادھو کر رہے ہیں۔