نذیر شیخ کی شاندار کامیابی: NET اور SET امتحانات پاس کرکے نئی تاریخ رقم کر دی

ناندیڑ :18؍اکتوبر ( نامہ نگار) معروف سماجی کارکن اور مصنف نذیر شیخ نے یو جی سی NET امتحان کامیابی سے پاس کر کے ایک اور اہم سنگِ میل عبور کر لیا ہے۔ اس سے قبل وہ مہاراشٹر SET امتحان بھی کامیابی سے پاس کر چکے ہیں۔ دونوں امتحانات میں ان کی کامیابی نے انہیں علمی حلقوں میں نمایاں مقام عطا کیا ہے۔ نذیر شیخ نے تاریخ کے مضمون میں SET اور NET دونوں امتحانات پاس کیے ہیں۔نذیر شیخ کا تعلق ناندیڑ کے ایک چھوٹے سے گاؤں دیلو ب سے ہے۔ بچپن ہی میں والدین کے انتقال کے بعد، انہوں نے سخت محنت اور عزم کے ساتھ اپنی تعلیم جاری رکھی۔ ان کی بڑی بہن اور خالہ نے ان کی پرورش میں اہم کردار ادا کیا، جنہوں نے ہر مشکل وقت میں ان کا ساتھ دیا اور سہارا فراہم کیا۔نذیر شیخ نے ابتدائی تعلیم اپنے آبائی گاؤں میں مکمل کی، جبکہ ثانوی اور اعلیٰ ثانوی تعلیم پارڈی کے راجابائی ہائی اسکول سے حاصل کی۔ بی اے کی ڈگری اردھاپور سے اور ایم اے ناندیڑ شہر سے مکمل کی۔ شیخ کا تعلیمی سفر مشکلات سے بھرا ہوا تھا، جہاں انہوں نے ساتویں جماعت سے بارہویں تک چار کلومیٹر پیدل اور بی اے کے دوران دس کلومیٹر سائیکل پر سفر کر کے تعلیم حاصل کی۔اپنی والدہ کے ساتھ کھیتوں میں مزدوری کرتے اور بکریاں پالتے ہوئے بھی انہوں نے تعلیمی میدان میں نمایاں کامیابیاں حاصل کیں۔ آج نذیر شیخ کی اس عظیم کامیابی پر نہ صرف ان کے اساتذہ بلکہ مہاراشٹر کی مختلف اہم شخصیات نے بھی انہیں دل کی گہرائیوں سے مبارکباد پیش کی ہے۔اس بڑی کامیابی پر پروفیسر سائی ناتھ، جگدیش قدم، الطاف حسین، دوست لکشمن کدم، فاروق احمد اور عبید باحسین سمیت کئی اہم شخصیات نے ان کی محنت، لگن اور کامیابی کو سراہا۔ نذیر شیخ کی یہ کامیابی ثابت کرتی ہے کہ محنت، عزم اور ہمت کے ساتھ ہر خواب کو حقیقت میں بدلا جا سکتا ہے۔شیخ نذیر کی شاندار کامیابی اب پورے علاقے میں موضوعِ بحث بن چکی ہے، اور وہ نوجوان نسل کے لیے ایک مثالی شخصیت اور رول ماڈل کے طور پر ابھر کر سامنے آئے ہیں۔