اس ملک کو جس میزائل مین پر فخر ہے، ان کی کامیابی کے پیچھے ان کی ہمشیرہ زہرہ کا اہم کردار

سولاپور :16؍اکتوبر( سلطان اختر): بھارت رتن ڈاکٹر اے پی جے عبدالکلام کے یومِ پیدائش کے موقع پر سوشل اردو ہائی اسکول میں یومِ ترغیبِ مطالعہ انتہائی تزک و احتشام کے ساتھ منایا گیا۔ اسکول کے وسیع کتب خانے میں منعقدہ اس پروقار جلسے کی صدارت پرنسپل رسول چودھری نے کی۔اس موقع پر فعال سپروائزر یاسمین شیخ نے طلبہ سے خطاب کرتے ہوئے کہا کہ ڈاکٹر اے پی جے عبدالکلام کی ملی اور علمی خدمات ناقابلِ فراموش ہیں۔ اس ملک کو جس میزائل مین پر فخر ہے، ان کی کامیابی کے پیچھے ان کی ہمشیرہ زہرہ کا اہم کردار تھا۔ انہوں نے مزید کہا کہ ڈاکٹر کلام ملک کے نوجوانوں کو بڑے خواب دیکھنے اور کڑی محنت کرنے کی ترغیب دیتے تھے، اور ان کا بنیادی مقصد بھارت کو ایک ترقی یافتہ ملک بنانا تھا۔ تقریب کے دوران سپروائزر الطاف کمٹھے نے بھی ڈاکٹر کلام کو شاندار الفاظ میں خراجِ عقیدت پیش کیا۔ اس موقع پر لائبریرین تبسم اگساپورے، عبدالرشید ملا، سلطان اختر اور ذوالکفل باغبان سمیت اسکول کا تدریسی عملہ موجود تھا۔تقریب کی نظامت کے فرائض سلطان اختر نے انجام دیے، جب کہ عبدالرشید ملا نے کلمۂ تشکر ادا کیا۔ اس بابرکت تقریب کے اختتام پر طلبہ نے کتب خانے میں موجود کتب کا مطالعہ کیا اور ان سے بھرپور استفادہ کیا۔ نائب صدر مدرس امتیاز شابدی سمیت جملہ اسٹاف نے نیک خواہشات کا اظہار کیا۔