ناندیڑ میں چین اسنیچنگ اور جبری چوری کے 9 مقدمات کا انکشاف؛ 6.74 لاکھ روپئے کا مال ضبط

ناندیڑ: 20؍ اگست(نمائندہ اعتبار) ناندیڑ شہر اور اطراف میں چین اسنیچنگ، بیگ اسنیچنگ اور جبری چوری کے 9 مقدمات کا انکشاف کرتے ہوئے پولیس نے ملزمین کے قبضے سے سونے کے زیورات، موبائل فون، نقد رقم اور واردات میں استعمال کی گئی موٹر سائیکل سمیت مجموعی طور پر 6 لاکھ 74 ہزار 75روپئے مالیت کا مسروقہ مال ضبط کیا ہے۔ یہ کارروائی ناندیڑ کے پولیس سپرنٹنڈنٹ ڈاکٹر نیلابھ روہن کی ہدایت پر لوکل کرائم برانچ، اتوارہاور شیواجی نگر کے جرائم تفتیشی دستوں نے انجام دی۔
پولیس کے مطابق 10 سے 19 اگست 2026ء کے دوران اتوارہ، شیواجی نگر، سون کھیڑ، بھاگیہ نگر، ناندیڑ دیہی اور ایئرپورٹ پولیس اسٹیشن کی حدود میں چین اسنیچنگ، بیگ اسنیچنگ اور جبری چوری کے 9 واقعات پیش آئے تھے۔ ان معاملات میں متاثرین سے سونے کے منگل سوتر، سونے کی چین، موبائل فون، نقد رقم اور موٹر سائیکل چھیننے کی وارداتیں شامل تھیں۔ پولیس نے سی سی ٹی وی فوٹیج، تکنیکی معلومات اور دستیاب خفیہ معلومات کی مدد سے ملزمین کا سراغ لگایا۔
اتوارہ، شیواجی نگر، سون کھیڑ اور بھاگیہ نگر پولیس اسٹیشنوں سے متعلق ابتدائی پانچ مقدمات میں پولیس نے سونے کے مختلف زیورات، چار VIVO اسمارٹ فون اور واردات میں استعمال کی گئی HERO Splendor موٹر سائیکل سمیت 4 لاکھ 64 ہزار 975روپئے مالیت کا مال ضبط کیا۔ اس کارروائی میں ایک 18 سالہ نوجوان یوگیش نرسنگ دارے واڑ اور ایک قانون سے متصادم نابالغ کی مبینہ شمولیت سامنے آنے کی بات پولیس نے کہی ہے۔
شیواجی نگر پولیس اسٹیشن کے ایک معاملے میں دت نگر ریلوے پٹری کے قریب ایک خاتون سے تقریباً 60 ہزارروپئے مالیت کا سونے کا منگل سوتر چھیننے کے واقعے میں ایک قانون سے متصادم نابالغ کا سراغ لگایا گیا۔ پولیس نے اس کے والدین کی تحویل سے تقریباً ڈیڑھ تولہ وزنی سونے کی چین، جس کی مالیت تقریباً 60 ہزارروپئے بتائی گئی ہے، مکمل طور پر ضبط کی۔
ناندیڑ دیہی پولیس اسٹیشن کے تحت واگھالہ میں 14 اگست کو پیش آنے والی چین اسنیچنگ کی واردات میں پولیس نے ارباز خان عرف ابو عارف خان پٹھان، عمر 30 سال، ساکن فاروق نگر، ناندیڑ کو گرفتار کیا۔ پولیس کے مطابق اس کے ایک ساتھی کی تلاش جاری ہے۔ ملزم کے قبضے سے تقریباً 2 گرام وزنی اور 30 ہزارروپئے مالیت کا منگل سوتر ضبط کیا گیا۔
شیواجی نگر پولیس اسٹیشن کے تحت انا بھاؤ ساٹھے چوک میں 18 اگست کو ایک شخص سے موبائل فون اور بیگ چھیننے کے معاملے میں گنیش راجارام ہورالے، عمر 28 سال، اور شیواجی پنڈلک ڈبوک واڑ، عمر 25 سال، دونوں ساکن نوری چوک، ناندیڑ کو حراست میں لیا گیا۔ پولیس نے ان کے قبضے سے تین موبائل فون، بیگ میں موجود نقد رقم اور واردات میں استعمال کی گئی Splendor موٹر سائیکل سمیت تقریباً 59 ہزار 100روپئے مالیت کا مال ضبط کیا۔ ریکارڈ کی جانچ میں مذکورہ موٹر سائیکل کا تعلق ایئرپورٹ پولیس اسٹیشن کے ایک مقدمے سے بھی سامنے آیا۔
ایئرپورٹ پولیس اسٹیشن کے تحت 19 اگست کو مہارانا پرتاپ چوک کے قریب ایک شخص کو روک کر خنجر دکھا کر مارپیٹ کرنے اور اس سے 4 ہزار 200روپئے نقد رقم اور 60 ہزارروپئے مالیت کی Splendor موٹر سائیکل چھیننے کے معاملے میں بھی پولیس نے کارروائی کی۔ اس مقدمے میں گنیش ہورالے اور اس کے ایک نامعلوم ساتھی کا مبینہ طور پر ملوث ہونا سامنے آیا۔ گنیش ہورالے اور شیواجی ڈبوک واڑ کو شیواجی نگر جرائم تفتیشی دستے نے حراست میں لے لیا ہے اور مزید قانونی کارروائی جاری ہے۔
پولیس کی جانب سے جاری کردہ تفصیلات کے مطابق مجموعی طور پر ضبط شدہ مال میں سونے کے منگل سوتر اور دیگر زیورات، چار VIVO اسمارٹ فون، تین دیگر موبائل فون، نقد رقم اور دو Splendor موٹر سائیکلیں شامل ہیں۔ تمام 9 مقدمات میں ضبط کیے گئے مال کی مجموعی مالیت 6 لاکھ 74 ہزار 75روپئے بتائی گئی ہے۔
پولیس کے مطابق کارروائی پولیس سپرنٹنڈنٹ ڈاکٹر نیلابھ روہن کی ہدایت پر لوکل کرائم برانچ، اتوارہ اور شیواجی نگر پولیس کے جرائم تفتیشی دستوں نے سی سی ٹی وی فوٹیج اور تکنیکی معلومات کی مدد سے انجام دی۔ ضبط شدہ مال اور دیگر جرائم میں ملزمین کے ممکنہ کردار کے بارے میں مزید تفتیش جاری ہے۔