ناندیڑ میونسپل کارپوریشن میں مانسون سے قبل تیاریوں اور ڈیزاسٹر مینجمنٹ کا کمشنر نے لیا جائزہ

ناندیڑ: 4 جولائی(نمائندہ اعتبار): آئندہ مانسون کے دوران ممکنہ قدرتی آفات کا مؤثر انداز میں مقابلہ کرنے، شہر کے شہریوں کی سلامتی کو یقینی بنانے اور ممکنہ جانی و مالی نقصان سے بچاؤ کے مقصد سے جمعہ، 3 جولائی 2026ء کو میونسپل کمشنر ڈاکٹر مہیش کمار ڈوئی پھوڑے کی صدارت میں مانسون سے قبل کیے جانے والے کاموں کا جائزہ اجلاس منعقد ہوا۔ اس اجلاس میں میونسپل کارپوریشن کے تمام محکمہ جاتی سربراہان موجود تھے۔ اجلاس میں کمشنر نے واضح ہدایات دیتے ہوئے کہا کہ بارش کے موسم میں شہریوں کو کسی بھی قسم کی دشواری پیش نہ آئے، اس بات کو ہر محکمہ یقینی بنائے، اور کام میں کسی بھی قسم کی تاخیر یا غفلت ہرگز برداشت نہیں کی جائے گی۔اجلاس کے آغاز میں ڈیزاسٹر مینجمنٹ افسر ڈاکٹر فرحت اللہ بیگ نے مختلف محکموں کو تفویض کیے گئے مانسون سے قبل کے کاموں کی تفصیلات پیش کیں، جس کے بعد میونسپل کمشنر نے محکمہ وار تیاریوں کا تفصیلی جائزہ لیا۔ انہوں نے ہدایت دی کہ شہر کے بڑے اور اندرونی نالوں کی صفائی مکمل کر لی گئی ہے، تاہم جہاں کہیں کام باقی ہو، اسے فوری طور پر مکمل کیا جائے۔ نالوں کے بہاؤ میں موجود تمام رکاوٹیں فوری طور پر دور کی جائیں تاکہ نشیبی علاقوں میں پانی جمع نہ ہو۔ محکمہ تعمیراتِ عامہ، مہاوترن اور میونسپل کارپوریشن کے متعلقہ محکمے آپس میں مؤثر تال میل قائم رکھیں۔ شہر کی سڑکوں پر جاری کھدائی کے کام فوری طور پر روک کر ادھورے کام جلد مکمل کیے جائیں۔اسی طرح میونسپل کارپوریشن کے مرکزی ڈیزاسٹر مینجمنٹ کنٹرول روم، علاقائی دفاتر کی سطح پر قائم کنٹرول روم اور 24 گھنٹے فعال ہیلپ لائن کو مکمل صلاحیت کے ساتھ شروع کرنے کے احکامات جاری کیے گئے ہیں۔ تیز ہواؤں کے باعث کسی بھی حادثے سے بچنے کے لیے شہر بھر میں غیر مجاز اور خطرناک ہورڈنگز کو ہٹا دیا جائے۔ اسی طرح خطرناک قرار دی گئی پرانی عمارتوں کو نوٹس جاری کرتے ہوئے فوری احتیاطی اقدامات کیے جائیں۔ سڑکوں کے کنارے موجود گرنے کے خطرے والے درختوں کو ہٹا کر دیگر درختوں کی شاخوں کی فوری کٹائی کی جائے تاکہ ٹریفک کی آمدورفت میں کوئی رکاوٹ پیدا نہ ہو۔ ہر زون کی سطح پر ہنگامی امدادی ٹیمیں تعینات رکھی جائیں۔ شہر کے تمام مین ہولز کے ڈھکن درست حالت میں ہونے کو یقینی بنایا جائے، جبکہ بڑی نالیوں سے ہٹائے گئے سلیبوں کا جائزہ لے کر مناسب کارروائی کی جائے۔ بارش کے موسم میں پھیلنے والی متعدی بیماریوں کی روک تھام کے لیے محکمہ صحت کو وافر مقدار میں ادویات کے ذخیرے کے ساتھ تیار رہنے کی ہدایت دی گئی ہے۔ صاف پانی کی فراہمی کو یقینی بنانے کے لیے پانی صاف کرنے والے تمام کیمیکلز کا مناسب ذخیرہ رکھا جائے اور آبی پائپ لائنوں کی مرمت کو ترجیح دی جائے۔
غفلت برتنے والوں کے خلاف سخت کارروائی ہوگی:
اس پس منظر میں میونسپل کمشنر کل صبح شہر کے چند اہم مقامات کا خود دورہ کرکے تیاریوں کا جائزہ لیں گے۔ اجلاس کے اختتام پر انہوں نے تمام علاقائی افسران اور انجینئروں کو اپنے اپنے علاقوں میں جاری کاموں کا موقع پر جا کر معائنہ کرنے کی ہدایت دی۔ مقررہ مدت کے اندر کام مکمل نہ ہونے کی صورت میں متعلقہ افسران اور ٹھیکیداروں کے خلاف سخت انتظامی اور قانونی کارروائی کی جائے گی۔