پربھنی مہانگر پالیکا الیکشن: طلبہ کی ریلیوں میں شرکت، تعلیمی نظام کے لیے تشویشناک صورتحال

تحریر :محمد ابرار علی خان(MA Bed)
بذریعہ ضلع نامہ نگار اعتبار نیوز محمد سرور شریف

پربھنی مہانگر پالیکا انتخابات کے دوران مختلف سیاسی جماعتوں کی ریلیوں اور جلوسوں میں طلبہ و طالبات کی شرکت اور اس کے نتیجے میں اسکولوں میں غیر حاضری ایک تشویشناک صورتِ حال اختیار کرتی جا رہی ہے۔ شہر کے متعدد سرکاری و نجی تعلیمی اداروں میں ان دنوں حاضری میں نمایاں کمی دیکھی جا رہی ہے، جس سے تعلیمی نظام متاثر ہو رہا ہے۔تعلیمی ماہرین اور اساتذہ کا کہنا ہے کہ انتخابی سرگرمیوں میں بچوں کو شامل کرنا نہ صرف تعلیمی نقصان کا باعث ہے بلکہ یہ ان کے مستقبل کے لیے بھی نقصان دہ ثابت ہو سکتا ہے۔ اساتذہ کے مطابق نصاب کی بروقت تکمیل، امتحانی تیاری اور تعلیمی تسلسل بری طرح متاثر ہو رہا ہے۔والدین اور سماجی حلقوں نے بھی اس صورتحال پر تشویش کا اظہار کرتے ہوئے مطالبہ کیا ہے کہ سیاسی جماعتیں طلبہ کو انتخابی سرگرمیوں سے دور رکھیں اور والدین اپنے بچوں کی باقاعدہ اسکول حاضری کو یقینی بنائیں۔ماہرین نے الیکشن کمیشن اور تعلیمی محکمے سے اپیل کی ہے کہ اس معاملے پر سختی سے عمل درآمد کرایا جائے تاکہ بچوں کا تعلیمی حق محفوظ رہ سکے اور تعلیمی نظام میں آنے والی اس کمی کو روکا جا سکے۔یہ وقت اس بات کا تقاضا کرتا ہے کہ سیاست اور تعلیم کے درمیان واضح حد قائم رکھی جائے تاکہ قوم کے مستقبل، یعنی طلبہ و طالبات، کا تعلیمی نقصان نہ ہو۔