مراٹھا برادری کو جیت ملی، سب کو ریزرویشن ملے گا: منوج جارنگے پاٹل

ممبئی:3 ستمبر:مراٹھا ریزرویشن کے معاملے پر ممبئی کے آزاد میدان میں غیر معینہ مدت کے لیے انشن پر بیٹھے منوج جرنگے پاٹل نے اپنا انشن توڑ دیا۔ فی الحال وہ چھترپتی سمبھاجی نگر کے ایک اسپتال میں داخل ہیں، جہاں ان کا علاج چل رہا ہے۔ اس دوران انہوں نے کہا کہ مراٹھا برادری کی جیت ہوئی ہے۔ میڈیا سے بات کرتے ہوئے منوج جارنگے پاٹل نے کہا کہ مراٹھا ریزرویشن کی لڑائی کئی سالوں سے چل رہی تھی، لیکن اب مراٹھا برادری کی جیت ہوئی ہے۔ حکومت نے جو فیصلے لئے ہیں وہ پوری مراٹھا برادری کی جدوجہد کا نتیجہ ہیں۔ میں صرف نام کے لیے کھڑا تھا، لیکن یہ جیت پوری برادری کی ہے۔ انہوں نے کہا کہ اس میں کوئی شک نہیں کہ مغربی مہاراشٹر اور مراٹھواڑہ کے تمام مراٹھوں کو ریزرویشن ملے گا۔ جن لوگوں کے نام گزٹ میں درج نہیں ہیں وہ ریزرویشن سے محروم نہیں رہیں گے۔ حکومت کی طرف سے ان کے لیے بھی کوششیں کی جائیں گی۔ منوج جارنگے نے کہا کہ ملک کو آزاد ہوئے 75 سال ہوچکے ہیں، لیکن آج تک مراٹھوں کو انصاف نہیں ملا ہے۔ حیدرآباد گزٹ میں واضح طور پر لکھا ہے کہ کنبی کا مطلب مراٹھا ہے۔ ممبئی میں احتجاج کرنے والے مراٹھوں کے خلاف درج مقدمات کے بارے میں، انہوں نے کہا کہ اس کی پوری ذمہ داری وزیر رادھا کرشن وکھے پاٹل پر عائد ہوتی ہے۔ جب ان سے بات کی گئی تو انہوں نے یقین دلایا کہ مظاہرین کے خلاف درج تمام مقدمات اور چالان واپس لے لیے جائیں گے۔ منوج جارنگے نے کہا کہ اگر کسی پر جرمانہ ہوا ہے تو اسے ادا کرنے کی ضرورت نہیں ہے، کیونکہ میں آپ کے ساتھ کھڑا ہوں۔ میں نے اپنی زندگی مراٹھا برادری کے لیے وقف کر دی ہے۔ انہوں نے کہا کہ ہم نے 50 فیصد سے زیادہ ریزرویشن کا مطالبہ نہیں کیا ہے۔ ہم پہلے ہی 50 فیصد کی حد کے اندر ہیں۔ او بی سی ریزرویشن کی فہرست میں کنبی کا تذکرہ 73 ویں نمبر پر ہے اور ہم سب کنبی ہیں۔