0 سے 5 سال کے بچوں کو ملیں گے تحفظ کے ’’دو قطرے‘‘

ناندیڑ: 25 جون(نمائندہ اعتبار) ناندیڑ ضلع میں 28 جون 2026 کو قومی پلس پولیو مہم بڑے پیمانے پر چلائی جائے گی۔ ضلع انتظامیہ اور محکمہ صحت نے مہم کی تمام تیاریاں مکمل کر لی ہیں تاکہ 0 سے 5 سال عمر کا کوئی بھی بچہ پولیو کے حفاظتی قطروں سے محروم نہ رہ جائے۔
ضلع کلکٹر راہل کرڈیلے اور چیف ایگزیکٹیو آفیسر میگھنا کاولی کی رہنمائی میں، جبکہ ضلع سرجن ڈاکٹر سنجے پیرکے اور ضلع صحت آفیسر ڈاکٹر سنتوش سوریہ ونشی کی منصوبہ بندی کے تحت مہم کو کامیاب بنانے کے لیے تمام متعلقہ محکمے متحرک ہیں۔ ماں و بچہ نگہداشت آفیسر ڈاکٹر سنتوش ناولے، ریزیڈنٹ میڈیکل آفیسر ڈاکٹر بوٹے اور محکمہ صحت کے تمام آفیسران و ملازمین اس مہم کو کامیاب بنانے کے لیے سرگرم عمل ہیں۔
محکمہ صحت نے ضلع میں مجموعی طور پر 3,88,526 بچوں کو پولیو کے قطرے پلانے کا ہدف مقرر کیا ہے، جن میں دیہی علاقوں کے 2,48,728 بچے، شہری علاقوں کے 46,943 بچے اور میونسپل کارپوریشن حدود کے 92,855 بچے شامل ہیں۔ اس مقصد کے لیے ضلع بھر میں مجموعی طور پر 2,843 پولیو بوتھ قائم کیے جائیں گے، جن میں 2,283 بوتھ دیہی علاقوں، 275 شہری علاقوں اور 285 بوتھ میونسپل کارپوریشن حدود میں ہوں گے۔
مہم کے لیے 7,431 ملازمین اور 643 سپروائزرز تعینات کیے گئے ہیں۔ مہم کے بعد 7,55,379 گھروں تک پہنچنے کے لیے 1,415 ہاؤس ٹو ہاؤس ٹیمیں تشکیل دی گئی ہیں، جبکہ ریلوے اسٹیشن، بس اسٹینڈ اور چیک پوسٹوں پر سفر کرنے والے بچوں کو پولیو کے قطرے پلانے کے لیے 277 ٹرانزٹ ٹیمیں اور دور دراز علاقوں، اینٹ بھٹوں اور نقل مکانی کرنے والے خاندانوں کے بچوں تک پہنچنے کے لیے 187 موبائل ٹیمیں خدمات انجام دیں گی۔
ضلع صحت آفیسر ڈاکٹر سنتوش سوریہ ونشی نے کہا کہ اس مہم کو صرف سرکاری پروگرام تک محدود نہیں رکھا جائے گا بلکہ اسے عوامی تحریک کی شکل دی جائے گی۔ ضلع بھر میں دیواری پوسٹروں، اعلانات، سوشل میڈیا اور مختلف عوامی پروگراموں کے ذریعے بڑے پیمانے پر بیداری مہم چلائی جا رہی ہے۔
انتظامیہ نے تمام متعلقہ محکموں کو باہمی تال میل کے ساتھ مائیکرو پلان کے مطابق کام کرنے کی ہدایت دی ہے اور ٹرانزٹ ٹیموں کو خصوصی طور پر یہ یقینی بنانے کی ذمہ داری سونپی گئی ہے کہ سفر کے دوران موجود کوئی بھی بچہ پولیو کے حفاظتی قطروں سے محروم نہ رہ جائے۔
ماں و بچہ نگہداشت آفیسر ڈاکٹر سنتوش ناولے نے ضلع کے تمام والدین سے اپیل کی ہے کہ وہ 28 جون کو اپنے 0 سے 5 سال تک کے بچوں کو قریبی پولیو بوتھ پر لے جا کر لازماً پولیو کے قطرے پلوائیں اور قومی پلس پولیو مہم کو کامیاب بنانے میں اپنا بھرپور تعاون کریں۔