ناندیڑ میں غیر قانونی اسلحہ رکھنے والوں کے خلاف کارروائی، 9 خنجر اور موٹر سائیکل ضبط

ناندیڑ: 15 اگست(نمائندہ اعتبار) ناندیڑ ضلع میں غیر قانونی اسلحہ رکھنے والوں کے خلاف جاری کارروائی کے تحت لوکل کرائم برانچ نے دو افراد کو خنجروں سمیت حراست میں لیتے ہوئے ایک دکان سے مزید 7 خنجر برآمد کیے ہیں۔ پولیس نے مجموعی طور پر 9 خنجر اور ایک موٹر سائیکل سمیت 89 ہزار 600 روپئے مالیت کا سامان ضبط کیا ہے۔پولیس کے مطابق 14 اگست کو لوکل کرائم برانچ کے پولیس سب انسپکٹر ناگ ناتھ تکڑے اور ان کی ٹیم کو خفیہ اطلاع ملی تھی کہ ناندیڑ کے ہنگولی گیٹ پھاٹک گراؤنڈ میں دو افراد موٹر سائیکل پر مشتبہ حالت میں موجود ہیں اور ان کے پاس خنجر ہیں۔ اطلاع کی تصدیق کے بعد پولیس ٹیم نے پنچوں کی موجودگی میں موقع پر پہنچ کر دونوں افراد کو موٹر سائیکل سمیت حراست میں لیا۔پوچھ گچھ کے دوران دونوں نے اپنے نام آکاش شنکر پالیمکر، عمر 24 سال، ساکن دیپک نگر، تروڑہ (بزرگ)، ناندیڑ، اور روہت آنندا ساوتے، عمر 23 سال، ساکن یلے گاؤں، تعلقہ اردھا پور، ضلع ناندیڑ، حال مقیم پی ڈبلیو ڈی کالونی کے قریب، آنند نگر چوک، ناندیڑ بتائے۔ تلاشی کے دوران ان دونوں کی کمر سے مجموعی طور پر دو خنجر برآمد ہوئے۔ پولیس کی پوچھ گچھ میں دونوں نے بتایا کہ یہ خنجر انہوں نے گردوارہ کے قریب واقع ایک دکان سے خریدے تھے۔اس اطلاع کی بنیاد پر لوکل کرائم برانچ کی ٹیم نے متعلقہ دکان کی تلاشی لی۔ دکاندار نے اپنا نام گرمتی سنگھ کھیم سنگھ بُنگئی، عمر 58 سال، ساکن گوردوارہ گیٹ نمبر 1، وزیرآباد، ناندیڑ بتایا۔ دکان کی تلاشی کے دوران مزید 7 خنجر برآمد ہوئے، جنہیں فروخت کرنے کے مقصد سے رکھا گیا تھا۔ اس طرح دونوں افراد اور دکان سے مجموعی طور پر 9 خنجر اور ایک موٹر سائیکل ضبط کی گئی، جن کی مجموعی مالیت 89 ہزار 600 روپئے بتائی گئی ہے۔ضبط شدہ سامان اور ملزمان کو مزید قانونی کارروائی کے لیے وزیرآباد پولیس اسٹیشن، ناندیڑ کے حوالے کیا گیا۔ اس معاملے میں وزیرآباد پولیس اسٹیشن میں رَجسٹر نمبر 406/2026 کے تحت بھارتی اسلحہ قانون کی دفعہ 4/25 کے تحت مقدمہ درج کیا گیا ہے اور مزید تفتیش جاری ہے۔یہ کارروائی پولیس سپرنٹنڈنٹ ڈاکٹر نیلابھ روہن کے احکامات پر لوکل کرائم برانچ کے پولیس انسپکٹر اتل بھوسلے کی رہنمائی میں پولیس سب انسپکٹر ناگ ناتھ تکڑے اور ان کی ٹیم نے انجام دی۔ ٹیم میں موہن ہاکے، ملند نرباگ، برہمانند لامتورے، آباراؤ پنگلواڑ اور لہو چاٹے شامل تھے۔ناندیڑ پولیس انتظامیہ کے مطابق ضلع میں غیر قانونی اسلحہ رکھنے، غیر قانونی ریت نکاسی و نقل و حمل، غیر قانونی شراب، جوا، گٹکا، منشیات کی فروخت و ذخیرہ اندوزی اور دیگر غیر قانونی سرگرمیوں کے خلاف آئندہ بھی سخت قانونی کارروائی جاری رہے گی۔ پولیس نے شہریوں سے اپیل کی ہے کہ اپنے علاقے میں غیر قانونی اسلحہ رکھنے یا کسی بھی غیر قانونی کاروبار کی اطلاع ملنے پر فوری طور پر ناندیڑ پولیس کو اطلاع دیں۔