نازیہ الٰہی کے خلاف قانونی کارروائی کا مطالبہ، ملکاپور پولیس اسٹیشن میں میمورنڈم پیش

ملکاپور: 26/ جون (محمد احسان سر ) موصولہ اطلاعات کے مطابق گذشتہ روز ملکاپور مسلم برادران کی جانب سے بھارتیہ جنتا پارٹی کی ترجمان نازیہ الٰہی کے خلاف ملکاپور پولیس اسٹیشن کے ذریعے پولیس سپرنٹنڈنٹ، ضلع بلڈھانہ کو ایک تحریری میمورنڈم پیش کیا گیا. اس پیش مکتوب میں کہا گیا ہے کہ نازیہ الٰہی نے مختلف ذرائع ابلاغ ( سوشل میڈیا ) عوامی پلیٹ فارمز پر اسلام مذہب اور حضرت محمد ﷺ اور امہات المؤمنین کے متعلق ایسے گستاخانہ و توہین آمیز بیانات دیے ہےجن سے مسلم برادری کے مذہبی جذبات شدید مجروح ہوئے ہیں. درخواست گزاروں کا کہنا ہے کہ اس نوعیت کے بیانات سے معاشرے میں نفرت، کشیدگی اور فرقہ وارانہ ہم آہنگی متاثر ہونے کا اندیشہ ہے. مکتوب میں مزید کہا گیا کہ ہندوستانی آئین ہر شہری کو اپنے مذہب پر عمل کرنے اور مذہبی عقائد کے احترام کا حق دیتا ہے، لہٰذا کسی بھی مذہب یا مذہبی شخصیت کے بارے میں توہین آمیز بیانات سماجی ہم آہنگی کے لیے نقصان دہ ہیں.ملکاپور کے مسلم برادران نے پولیس انتظامیہ سے مطالبہ کیا ہے کہ معاملے کی غیر جانبدارانہ تحقیقات کرائی جائیں اور اگر متعلقہ فرد قانون کی خلاف ورزی کا مرتکب پایا جائے تو بھارتیہ نیائے سنہتا (BNS) اور دیگر متعلقہ قوانین کے تحت مناسب قانونی کارروائی کی جائے.