اقراء اسکول اور طوبیٰ جونیئر کالج میں انعامات کی تقسیم کی پُر وقار تقریب

پربھنی:27؍جنوری ( ضلع نامہ نگار اعتبار نیوز محمد سرور شریف ) 26 جنوری 2025 کو ثنا ایجوکیشن سوسائٹی کے زیر اہتمام اقراء اسکول اور طوبیٰ جونئیر کالج میں ایک شاندار تقریب کا انعقاد کیا گیا، جس میں طلبہ کی تعلیمی اور ہم نصابی سرگرمیوں میں شاندار کارکردگی کا اعتراف کرتے ہوئے انعامات تقسیم کیے گئے۔تقریب کا آغاز تلاوتِ قرآنِ پاک اور قومی ترانے سے ہوا۔ طلبہ کی کارکردگی کا جشن منانے کے لیے رنگارنگ پروگرامز پیش کیے گئے، جن میں تقریری مقابلے، خاکے، نغمے اور مختلف ٹیبلوز شامل تھے۔ پروگرام میں موجود تمام طلبہ اور والدین نے جوش و خروش سے شرکت کی۔ثنا ایجوکیشن سوسائٹی کے سیکرٹری سید مجاہد علی صاحب نے تقریب میں خطاب کرتے ہوئے طلبہ کی کامیابیوں کو سراہا اور ان کے مستقبل کے لیے نیک تمناؤں کا اظہار کیا۔ انہوں نے کہا کہ ایسی تقریبات طلبہ کو مثبت طرزِ فکر، محنت اور لگن کے ساتھ اپنے اہداف حاصل کرنے کی تحریک فراہم کرتی ہیں۔ہائی اسکول کے ہیڈ ماسٹر سید مشتاق علی صاحب نے کہا کہ طلبہ کی کامیابی صرف ان کی محنت کا نتیجہ نہیں بلکہ اس میں اساتذہ اور والدین کا تعاون بھی شامل ہے۔ پرائمری سیکشن کے ہیڈ ماسٹر محمد رئیس صاحب نے کہا کہ انعامات کی تقسیم بچوں کے اندر مزید بہتر کارکردگی کا جذبہ پیدا کرتی ہے اور ان کی صلاحیتوں کو نکھارتی ہے۔تقریب میں نمایاں کارکردگی دکھانے والے طلبہ کو کینٹین ڈے، اسپورٹس ویک، کوئز مقابلے اور دیگر سرگرمیوں میں ان کی شاندار کارکردگی پر انعامات سے نوازا گیا۔ والدین نے اساتذہ اور اسکول انتظامیہ کی محنت کو سراہا اور بچوں کی تعلیمی ترقی پر خوشی کا اظہار کیا۔تقریب کا اختتام دعا کے ساتھ ہوا، جس میں طلبہ کے روشن مستقبل اور کامیابیوں کے لیے دعا کی گئی۔