’’ وزیر اعلیٰ میری لاڈلی بہن اسکیم ‘‘کے لیے دستاویزات تیار رکھیں!

ناندیڑ:یکم جولائی (اعتبار نیوز) ضلع انتظامیہ نے خواتین کو بااختیار بنانے کے لیے مہاراشٹر حکومت کی ’’ وزیر اعلیٰ میری لاڈلی بہن اسکیم‘‘کے لیے بھرپور تیاری شروع کر دی ہے۔ ضلع کلکٹر ابھیجیت راؤت اور سی ای او منل کرنوال نے تحصیل آفس، تمام بینک عہدیداروں، گرام سیوک ، آنگن واڑی کارکنان اور گاؤں کے پڑھے لکھے نوجوانوں سے انتظامیہ کا ساتھ دینے کی اپیل کی ہے تاکہ ضلع کی ایک بھی اہل خاتون اس سے محروم نہ ہونے پائے۔ ریاستی حکومت کی وزیر اعلیٰ میری لاڈلی بہن اسکیم کے تحت ناندیڑ ضلع میں کوئی بھی اہل استفادہ کنندہ محروم نہیں رہے گا۔ اس کے لیے آج ضلع کلکٹر نے ضلع کے تمام مشنری کو ہدایات دی ہیں اور بتایا کہ اگلے دو دنوں میں موبائل ایپ لانچ کر دیا جائے گا اور مستحقین، سیتو اور سروس سنٹر کے ملازمین ، ہر پڑھا لکھا نوجوان اپنے ضلع کی ہر اہل بہن کا درخواست فارم اپ لوڈ کرے گا۔ اس طرح کی اپیل بھی انہوں نے کی۔
کیا اسکیم ہے:
ریاستی حکومت کی جانب سے اعلان کردہ وزیر اعلیٰ میری لاڈلی بہن اسکیم میں مہاراشٹر کی 21 سے 60 سال کی عمر کی شادی شدہ، بیوہ، طلاق یافتہ، لاوارث اور بے سہارا خواتین کے اکاؤنٹ میں ڈیڑھ ہزار روپے ہر ماہ براہ راست جمع کیے جائیں گے۔
اسکیم سے کون فائدہ اٹھاسکتا ہے؟
اسکیم سے فائدہ اٹھانے والی خاتون کا ریاست مہاراشٹر کی رہائشی ہونا ضروری ہے، ریاست کی شادی شدہ، بیوہ، طلاق یافتہ، بیوہ اور بے سہارا خواتین اہل ہیں۔ یہ فائدہ 21 سال اور زیادہ سے زیادہ 60سال کی عمر تک حاصل کیا جا سکتا ہے۔ اسکیم کے لیے فائدہ اٹھانے والے کے پاس بینک اکاؤنٹ ہونا ضروری ہے۔ فائدہ اٹھانے والے خاندان کی سالانہ آمدنی ڈھائی لاکھ سے زیادہ نہیں ہونی چاہیے، ایسے خاندان کا کوئی فرد مستفید ہو سکتا ہے۔
کن دستاویزات کی ضرورت ہے؟
اس اسکیم سے فائدہ اٹھانے کے لیے ریاستی حکومت کی طرف سے تیار کردہ ایپ پر آن لائن درخواست دینا ضروری ہے۔ اس کے لیے فائدہ اٹھانے والے کا آدھار کارڈ، ڈومیسائل سرٹیفکیٹ، انکم سرٹیفکیٹ، بینک پاس بک کے پہلے صفحے کی اسکین شدہ کاپی، پاسپورٹ سائز تصویر، راشن کارڈ، شرائط و ضوابط کی تعمیل کرنے کا عہد۔
کلکٹر، سی ای او کی طرف سے جاری کردہ ہدایات
اس سکیم سے مستفید ہونے والی اہل خواتین تحصیل دفتر میں ڈومیسائل سرٹیفکیٹ کے لیے درخواست دے سکتی ہیں، اس کے علاوہ جن کے پاس بینک اکاؤنٹ نہیں ہے وہ بینک اکاؤنٹ کھولنے کے لیے بینک سے رابطہ کر سکتے ہیں۔ آدھار کارڈ کو بینک اکاؤنٹ سے لنک کرنے کے لیے رابطہ کیا جا سکتا ہے۔ زیرو بیلنس اکاؤنٹ کھولنے کے لیے رابطہ کر سکتے ہیں۔ اس لیے تحصیلدار اور بینک ملازمین کو چاہیے کہ وہ خواتین استفادہ کنندگان کو بہتر تعاون فراہم کریں۔ ضلع کلکٹر نے مشنری کو بتایا ہے کہ وہ اس پورے عمل پر پوری توجہ دے رہے ہیں۔آج اس سلسلے میں ریاست کے تمام ضلع کلکٹرس کی آن لائن میٹنگ منعقد ہوئی۔ خواتین و اطفال بہبود کی وزیر آدیتی تٹکرے نے ممبئی سے اس اسکیم کے بارے میں ہدایات دیں، جبکہ میٹنگ میں ضلع کلکٹر اور ضلع پریشد کی سی ای او مینل کرنوال، ضلع خواتین و اطفال بہبود آفیسر روپالی رنگاری، ضلع پروگرام آفیسر آر پی کالم موجود تھے۔