اتوارہ پولیس کی بڑی کارروائی، 6,500 ممنوعہ گولیاں، 771 گرام گانجہ اور ایک تلوار ضبط

ناندیڑ :2؍جولائی ( نامہ نگار)پولیس سپرنٹنڈنٹ ناندیڑ ڈاکٹر نیلابھ روہن، کی رہنمائی میں ضلع ناندیڑ میں منشیات کے خلاف جاری خصوصی مہم کے تحت پولیس اسٹیشن اتوارہ کی حدود میں مؤثر کارروائی انجام دی گئی۔ پولیس اسٹیشن اتوارہ میں جرم رجسٹر نمبر 229/2026 کے تحت دفعہ 8(C)، 20(B)(ii)(B) NDPS ایکٹ اور دیگر متعلقہ دفعات کے تحت مقدمہ درج ہے۔ اس مقدمے کی تفتیش کے دوران بڑی مقدار میں ممنوعہ ادویات، منشیات اور ایک ہتھیار ضبط کیا گیا۔کارروائی کے دوران ضبط کیے گئے سامان میں 1) ممنوعہ دوا پریگالاب-300 (Pregalab-300) کے 65 ڈبے (ہر ڈبے میں 10 گولیوں کی 10 پٹیاں، یعنی مجموعی طور پر 6,500 گولیاں)، 2) 771 گرام گانجہ، اور 3) ایک تلوار شامل ہے۔اس معاملے میں ونود رام چندر جونڈھلے کے خلاف قانونی کارروائی کی گئی ہے اور مقدمے کی مزید تفتیش جاری ہے۔ اس کیس میں دیگر ملزمان اور منشیات کی سپلائی چین کا سراغ لگانے کی کوششیں بھی جاری ہیں، جبکہ تفتیش کے مطابق مزید قانونی کارروائی عمل میں لائی جا رہی ہے۔یہ کارروائی ڈاکٹر نیلابھ روہن، سورج گرو، پرشانت شندے، خنال اور سنجے شندے کی رہنمائی میں تفتیشی آفیسر پولیس سب انسپکٹر دیشمکھ، پولیس سب انسپکٹر پروین آگلاوے، پولیس اہلکار بیگ، جگتاپ، رِٹھے واڑ، کورنولے، اسرائیل، سکھئی، قدم، خاتون پولیس اہلکار کامبلے اور شندے نے کامیابی کے ساتھ انجام دی۔ناندیڑ ضلع پولیس نے واضح کیا ہے کہ منشیات کی فروخت، ذخیرہ اندوزی اور نقل و حمل میں ملوث افراد کے خلاف آئندہ بھی سخت اور مؤثر کارروائی جاری رہے گی۔ پولیس نے شہریوں سے اپیل کی ہے کہ اس نوعیت کی کسی بھی غیر قانونی سرگرمی کی اطلاع فوری طور پر پولیس انتظامیہ کو دے کر تعاون کریں۔