پولیس ڈپٹی انسپکٹر جنرل شہاجی اماپ کا ناندیڑ میں شکایت کنندگان سے ’’جن سنواد‘‘

ناندیڑ:30؍جنوری ( نمائندہ اعتبار) شہریوں کی شکایات کو سمجھ کر ان کا فوری ازالہ کرنا، پولیس اور عوام کے درمیان رابطہ مضبوط بنانا اور عوام دوست طرزِ عمل کے ذریعے پولیس پر عوام کا اعتماد مستحکم کرنا، ان مقاصد کے تحت پولیس ڈپٹی انسپکٹر جنرل شہاجی اماپ نے ناندیڑ رینج کے چاروں اضلاع میں ’’جن سنواد‘‘ مہم کا آغاز کیا ہے۔رینج کے چاروں اضلاع کی کارکردگی کا جائزہ لینے کے لیے پولیس ڈپٹی انسپکٹر جنرل ہر ماہ ضلعی صدر دفاتر کا دورہ کرتے ہیں۔ اس دوران وہ متعلقہ ضلع کے شکایت کنندگان سے براہِ راست ملاقات کرکے ان کی شکایات اور مسائل سنتے ہیں اور ان کے فوری ازالے کی کوشش کرتے ہیں۔30 جون کو پولیس ڈپٹی انسپکٹر جنرل شہاجی اماپ نے سپرنٹنڈنٹ آف پولیس، ناندیڑ کے دفتر میں ضلع پولیس کی ماہانہ کارکردگی کا جائزہ لینے کے بعد دوپہر 3 بجے سے شام 5 بجے تک ضلع کے شکایت کنندگان سے ’’جن سنواد‘‘ کے تحت ملاقات کی۔ اس موقع پر مجموعی طور پر 39 شکایت کنندگان نے اپنی تحریری درخواستیں پولیس ڈپٹی انسپکٹر جنرل کو پیش کیں۔ ان میں جائیداد سے متعلق تنازعات، لاپتہ افراد، مارپیٹ، سائبر دھوکہ دہی اور درج مقدمات کی تفتیش سے متعلق شکایات شامل تھیں۔اس روز موصول ہونے والی تمام شکایات کا سنجیدگی سے نوٹس لیتے ہوئے ان کے فوری ازالے کے لیے متعلقہ سب ڈویژنل پولیس آفیسرس اور پولیس اسٹیشنوں کے انچارج افسران کو ضروری ہدایات جاری کی گئیں۔شکایت کنندگان کی درخواستوں کے فوری ازالے کے لیے پولیس ڈپٹی انسپکٹر جنرل کے دفتر کی جانب سے پہلے ہی ’’سنویدنا‘‘ کے نام سے شکایت ازالہ نظام شروع کیا جا چکا ہے۔ آج ’’جن سنواد‘‘ مہم کے دوران موصول ہونے والی تمام درخواستیں مزید جانچ اور کارروائی کے لیے ’’سنویدنا‘‘ پورٹل کے ذریعے متعلقہ افسران کو ارسال کی جائیں گی، جبکہ ہر شکایت پر ہونے والی کارروائی کا جائزہ ناندیڑ رینج کے دفتر کی فیڈبیک ٹیم کے ذریعے لیا جائے گا۔اس موقع پر سپرنٹنڈنٹ آف پولیس نیلابھ روہن، ایڈیشنل سپرنٹنڈنٹ ارچنا پاٹل، ایڈیشنل سپرنٹنڈنٹ سورج گرو، ناندیڑ ضلع کے تمام سب ڈویژنل پولیس آفیسرس اور شہر کے تمام پولیس اسٹیشنوں کے انچارج افسران موجود تھے۔