ناندیڑ دیہی پولیس کی کارروائی، غیر قانونی ریت کی نقل و حمل کرنے والے ریت مافیا کے خلاف 2 مقدمات درج

ناندیڑ: 28؍جون ( نمائندہ اعتبار) ضلع میں غیر قانونی ریت کی کانکنی، ریت کی غیر قانونی نقل و حمل اور دیگر غیر قانونی دھندوں کے خلاف کارروائی کے لیے سپرنٹنڈنٹ آف پولیس ڈاکٹر نیلابھ روہن کی ہدایت پر خصوصی مہم چلائی جا رہی ہے۔ اسی سلسلے میں پولیس اسٹیشن ناندیڑ دیہی کے پولیس انسپکٹر اومکانت چنچولکر کی ٹیم نے مؤثر کارروائی کرتے ہوئے غیر قانونی طور پر ریت لے جانے والا ایک ہائیوا ٹرک ضبط کیا، جبکہ گوداوری ندی کے گھاٹ پر کارروائی کرتے ہوئے ریت نکالنے میں استعمال ہونے والی کشتی، انجن اور بیڑے بھی ضبط کر لیے۔27؍جون 2026 کو پولیس اسٹیشن ناندیڑ دیہی کے آفیسران اور اہلکار معمول کے مطابق گشت کر رہے تھے کہ انہیں اطلاع ملی کہ ہائیوا نمبر MH28R7800 کے ذریعے غیر قانونی طور پر ریت منتقل کی جا رہی ہے۔ پولیس نے مذکورہ گاڑی کو روک کر جانچ کی تو ڈرائیور کے پاس ریت کی نقل و حمل کا کوئی قانونی اجازت نامہ موجود نہیں تھا، جس پر دو پنچوں کی موجودگی میں ہائیوا ضبط کرکے مقدمہ درج کیا گیا۔اسی دوران گوداوری ندی کے پاٹ سے غیر قانونی طور پر ریت نکالنے کے لیے استعمال ہونے والی کشتی، انجن اور بیڑے بھی ضبط کیے گئے۔ اس کارروائی میں مجموعی طور پر 2 مقدمات درج کیے گئے، جن میں 5 ملزمین کو نامزد کیا گیا ہے۔ ان کے نام یہ ہیں: 1) سمدھان بابا صاحب جادھو، ساکن گووردھن گھاٹ، ناندیڑ، 2) آدیناتھ مورے، 3) تُکارام مورے، دونوں ساکن بھنگی، جبکہ دو دیگر نامعلوم ملزمین بھی شامل ہیں۔
ملزمین کے خلاف پولیس اسٹیشن ناندیڑ دیہی میں جرم نمبر 783/2026 اور 784/2026 کے تحت بھارتیہ نیائے سنہتا کی دفعات 303(2) اور 3(5)، نیز مہاراشٹر لینڈ ریونیو ایکٹ کی دفعات 48(7) اور 48(8) کے تحت مقدمات درج کیے گئے ہیں۔ اس کارروائی میں مجموعی طور پر 72 لاکھ 50 ہزار روپئے مالیت کا سامان ضبط کیا گیا۔یہ کارروائی سپرنٹنڈنٹ آف پولیس ڈاکٹر نیلابھ روہن، ایڈیشنل سپرنٹنڈنٹ آف پولیس بھوکر ارچنا پاٹل، ایڈیشنل سپرنٹنڈنٹ آف پولیس ناندیڑ سورج گرو، سب ڈویژنل پولیس آفیسر اٹوارہ پرشانت شندے کی رہنمائی میں پولیس انسپکٹر اومکانت چنچولکر، پولیس سب انسپکٹر بابوراؤ چوہان، پولیس سب انسپکٹر وینکٹ کُسمے، پولیس ہیڈ کانسٹیبل کانگلے، بھیسے، پولیس کانسٹیبل ضمیر، سرملوار اور ناندیڑ دیہی پولیس اسٹیشن کے دیگر اہلکاروں نے انجام دی۔پولیس انتظامیہ نے انتباہ دیا ہے کہ ضلع میں غیر قانونی ریت کی کانکنی، ریت کی غیر قانونی نقل و حمل، غیر قانونی شراب، جوا اور گٹکھا جیسے غیر قانونی کاروبار کرنے والوں کے خلاف آئندہ بھی اسی طرح کی سخت کارروائیاں جاری رہیں گی۔