ناندیڑ:چار دنوں کے لیے یلو الرٹ جاری

ناندیڑ: 24 جون(نمائندہ اعتبار) علاقائی محکمۂ موسمیات، ممبئی کی جانب سے 24 جون 2026ء کو جاری کردہ اطلاع کے مطابق ضلع ناندیڑ کے لیے 24 تا 27 جون 2026ء چار دنوں کے لیے یلو (Yellow) الرٹ جاری کیا گیا ہے۔محکمۂ موسمیات نے پیش گوئی کی ہے کہ 24، 26 اور 27 جون 2026ء کو ضلع کے بعض مقامات پر 30 تا 40 کلومیٹر فی گھنٹہ کی رفتار سے تیز ہوائیں چلنے، بجلی کی کڑک اور گرج چمک کے ساتھ درمیانی درجے کی بارش ہونے کا امکان ہے، جبکہ 25 جون 2026ء کو بعض مقامات پر 30 تا 40 کلومیٹر فی گھنٹہ کی رفتار سے تیز ہواؤں، بجلی کی کڑک اور گرج چمک کے ساتھ موسلادھار بارش ہونے کا زیادہ امکان ظاہر کیا گیا ہے۔اس قدرتی آفت کے پیش نظر تمام متعلقہ محکموں اور عوام سے احتیاطی تدابیر اختیار کرنے کی اپیل کی گئی ہے۔
آسمان میں بجلی چمکنے کی صورت میں درج ذیل احتیاطی تدابیر اختیار کریں:
• اگر گرج چمک کے ساتھ بارش کی پیشگی اطلاع ہو تو غیر ضروری طور پر گھر سے باہر نہ نکلیں۔
• اگر آپ کھلی جگہ پر موجود ہوں اور قریب کوئی محفوظ عمارت نہ ہو تو نشیبی مقام پر بیٹھ جائیں اور اپنا سر گھٹنوں کے درمیان رکھیں۔
• بجلی چمکنے کی صورت میں گھر یا کسی محفوظ عمارت میں پناہ لیں۔ گھر کی بالکونی، چھت یا باہر کے برآمدے میں نہ ٹھہریں۔
• اگر گھر میں برقی آلات استعمال ہو رہے ہوں تو انہیں فوراً بند کر دیں۔
• تاروں کی باڑ، بجلی کے کھمبوں اور دیگر لوہے کی اشیاء سے دور رہیں۔
• اگر پانی میں کھڑے ہوں تو فوراً باہر نکل آئیں۔
یہ کام ہرگز نہ کریں:
• بجلی چمکنے کے دوران گھر کے لینڈ لائن فون کا استعمال نہ کریں۔
• شاور کے نیچے نہ نہائیں۔
• گھر کے نلکوں، پانی کی پائپ لائنوں یا کسی بھی برقی آلے کو ہاتھ نہ لگائیں۔
• گرج چمک اور تیز ہواؤں کے دوران لوہے کے فریم والے خیموں یا شیڈ میں پناہ نہ لیں۔
• اونچے درختوں کے نیچے کھڑے نہ ہوں۔
• دھاتی اونچے ٹاورز یا میناروں کے قریب نہ جائیں۔
• اگر آپ گھر کے اندر ہوں تو کھلے دروازے یا کھڑکی سے بجلی گرنے کا منظر دیکھنے کی کوشش نہ کریں، کیونکہ یہ باہر کھڑے رہنے جتنا ہی خطرناک ہو سکتا ہے۔