ایران اسی شدت کے ساتھ چھ ماہ تک وسیع جنگ کے لیے تیار ہے: پاسدارانِ انقلاب

تہران:9؍مارچ:ایرانی پاسدارانِ انقلاب کے ترجمان علی محمد نائینی نے اعلان کیا ہے کہ ایرانی مسلح افواج اسی شدت اور رفتار کے ساتھ 6 ماہ تک مسلسل وسیع پیمانے پر جنگ لڑنے کے لیے مکمل طور پر تیار ہیں۔ انہوں نے زور دے کر کہا کہ افواج کی حربی تیاری اور عسکری صلاحیت کے پیشِ نظر کسی بھی قسم کی تشویش کی کوئی ضرورت نہیں ہے۔نائینی نے ہفتے کی شام ایک پریس کانفرنس کے دوران، جس میں ایک ہفتہ قبل شروع ہونے والی جنگ کے اہم عسکری معرکوں کا جائزہ پیش کیا گیا، بتایا کہ ایرانی حملوں نے امریکہ کے زیرِ انتظام جدید ترین ریڈار سسٹم کو نشانہ بنایا ہے۔انہوں نے مزید تفصیلات فراہم کرتے ہوئے کہا کہ اب تک مجموعی طور پر تھاد سسٹم سے وابستہ 7 جدید ترین ریڈار تباہ کیے جا چکے ہیں، جو خطے میں نصب نگرانی اور دفاعی نظاموں میں سب سے نمایاں شمار کیے جاتے ہیں۔ انہوں نے ان حملوں کو امریکی سکیورٹی چھتری کے ایک بڑے حصے کو مفلوج کرنے کے مترادف قرار دیا۔نائینی نے اشارہ کیا کہ ان فوجی کارروائیوں میں مختلف اقسام کے 600 میزائل داغے گئے ہیں، جن میں بیلسٹک میزائل اور مائع و ٹھوس ایندھن پر چلنے والے کروز میزائل شامل ہیں۔ اس کے علاوہ جنگ کے پہلے ہفتے کے دوران 2600 ڈرون حملے بھی کیے گئے۔ترجمان پاسدارانِ انقلاب نے واضح کیا کہ ان حملوں میں قابض اسرائیل کے اندر موجود اہداف کے علاوہ 200 سے زائد امریکی مقامات اور تنصیبات کو نشانہ بنایا گیا۔ انہوں نے اس بات کی تصدیق کی کہ جنگ کے ابتدائی تین دنوں میں ایران کی طرف سے کی جانے والی بمباری کی شدت گذشتہ سنہ 2025 جون میں ہونے والی 12 روزہ جنگ کی مجموعی شدت کے برابر تھی۔