بھارت کی آزادی میں مسلمانوں کا حصہ:مباحثہ مقابلہ — خبری رپورٹ (اردو)

جلگاؤں:24؍جنوری (راست)اقراء شاہین اردو ہائی اسکول اینڈ جونیئر کالج میں بھارت کی آزادی میں مسلمانوں کے تاریخی کردار کو اجاگر کرنے کے مقصد سے ایک شاندار مباحثہ مقابلے کا انعقاد کیا گیا۔ اس مباحثے کا عنوان “بھارت کی آزادی میں مسلمانوں کا حصہ” رکھا گیا، جس میں طلبہ و طالبات نے نہایت اعتماد، مدلل انداز اور تاریخی حوالوں کے ساتھ اپنے خیالات پیش کیے۔پروگرام کی شروعات تلاوتِ کلامِ پاک سے ہوئی، جس کے بعد اساتذہ نے آزادی کی جدوجہد میں مولانا ابوالکلام آزاد، اشفاق اللہ خان، بہادر شاہ ظفر، خان عبدالغفار خان، مولانا محمد علی جوہر اور دیگر عظیم مجاہدین کی قربانیوں پر روشنی ڈالی۔ مقررینِ طلبہ نے اپنے خطابات میں یہ واضح کیا کہ مسلمانوں نے متحدہ جدوجہد کے ذریعے وطنِ عزیز کی آزادی میں کلیدی کردار ادا کیا۔مباحثے کے دوران طلبہ نے قومی یکجہتی، بھائی چارے اور سیکولر اقدار کو فروغ دینے پر زور دیا۔ ججوں نے تقریر کی روانی، موضوع کی گرفت، دلائل اور پیشکش کی بنیاد پر نتائج کا اعلان کیا۔ اس مباحثہ پروگرام میں جناب سہیل امیر سر نے بحثیت جج کے فرائض انجام دیئے۔ پروگرام میں عرفان سالار صاحب اور اقراء ایچ جے تھیم کالج کے انچارج پرنسپل ڈاکٹر وقار شیخ، ذاکر بشیر سر، عتیق اللہ خان سر وغیرہ موجود تھے۔پرنسپل جناب ریاض شاہ نے اپنے صدارتی خطاب میں کہا کہ اس طرح کی علمی سرگرمیاں طلبہ میں تاریخی شعور، قومی فخر اور ذمہ دار شہری بننے کی صلاحیت پیدا کرتی ہیں۔ پروگرام کا اختتام قومی ترانے اور دعائیہ کلمات کے ساتھ ہوا۔یہ مباحثہ مقابلہ طلبہ کے لیے نہ صرف معلوماتی ثابت ہوا بلکہ وطن سے محبت اور باہمی احترام کے جذبات کو بھی مضبوط کرنے کا ذریعہ بنا۔