کیندر پرمُکھ امتحان شیڈول میں تبدیلی کا مطالبہ

پونے 23 جنوری (نمائندہ): اکھل مہاراشٹر اُردو شکشک سنگھٹنا (کُل مہاراشٹر اردو اساتذہ تنظیم/ AMUSS) نے مہاراشٹر اسٹیٹ امتحانی کونسل، پونے (MSEC ) سے مطالبہ کیا ہے کہ ضلع پریشد انتخابات کے باعث گروپ ریسورس کوآرڈینیٹر (کیندر پرمُکھ) عہدے کے لیے منعقد ہونے والے امتحان کے شیڈول میں ضروری تبدیلی کی جائے۔تنظیم کی جانب سے کونسل کے کمشنر کو پیش کردہ عرضداشت میں کہا گیا ہے کہ مہاراشٹر اسٹیٹ امتحانی کونسل نے گروپ ریسورس کوآرڈینیٹر (کیندر پرمُکھ) کے عہدے کے لیے 3 اور 4 فروری 2026ء کو ریاست بھر میں آن لائن امتحان منعقد کرنے کا اعلان کیا ہے جبکہ ریاست کے مختلف اضلاع میں اس وقت ضلع پریشد کے انتخابات کا عمل جاری ہے جو 5 فروری 2026ء کو مکمل ہوگا۔عرضداشت میں نشاندہی کی گئی ہے کہ جن اضلاع میں ضلع پریشد انتخابات ہو رہے ہیں وہاں خدمات انجام دینے والے اساتذہ کی 3 اور 4 فروری کو انتخابی ڈیوٹی پر تقرری کا قوی امکان ہے۔ چونکہ انتخابی فرائض انجام دینا لازمی اور قانونی ذمہ داری ہے اس لیے ایسے اساتذہ کے لیے امتحان میں شرکت کرنا عملی طور پر ممکن نہیں ہوگا جس کے نتیجے میں وہ ایک اہم امتحانی موقع سے محروم ہو سکتے ہیں۔تنظیم نے بتایا کہ ریاست کے مختلف اضلاع کے اردو میڈیم کے اساتذہ نے اس سلسلے میں اپنی مشکلات تنظیم کے سامنے رکھی ہیں اور ان کا کہنا ہے کہ انتخابی ذمہ داریوں کے باعث امتحان کا موقع ضائع ہونا ناانصافی کے مترادف ہوگا۔ اساتذہ کی خدمات اور انتظامی ذمہ داریوں کو مدنظر رکھتے ہوئے ان کے ساتھ انصاف ہونا ضروری ہے۔اکھل مہاراشٹر اردو شکشک سنگھٹنا نے مطالبہ کیا ہے کہ جن ضلع پریشد حلقوں میں انتخابات منعقد ہو رہے ہیں وہاں گروپ ریسورس کوآرڈینیٹر (کیندر پرمُکھ) عہدے کے امتحان کا شیڈول انتخابی عمل کے بعد علیحدہ طور پر طے کیا جائے تاکہ متعلقہ اساتذہ کو امتحان میں شرکت کا پورا موقع مل سکے اور فطری انصاف برقرار رہے۔تنظیم نے امید ظاہر کی ہے کہ مہاراشٹر اسٹیٹ امتحانی کونسل اس مطالبے پر ہمدردانہ اور مثبت غور کرتے ہوئے مناسب فیصلہ کرے گی۔