ممتا کالونی تا عبید ریذیڈنسی روڈ کی خستہ حالت پر شہریوں کی تشویش

ناندیڑ:8؍اکتوبر(نامہ نگار)ناندیڑ شہر کے وارڈ نمبر 11 میں ممتا کالونی (محمدیہ مسجد کے سامنے) سے لے کر عبید ریذیڈنسی تک جانے والا روڈ انتہائی خستہ حالی کا شکار ہوچکا ہے۔ سڑک کے دونوں جانب گہرے گڑھوں اور خراب سطح کی وجہ سے روزانہ حادثات پیش آ رہے ہیں، جس سے مقامی شہریوں میں شدید ناراضگی پائی جا رہی ہے۔اسی مسئلے کو اجاگر کرتے ہوئے سماجی کارکن عبدالرحیم پٹیل نے آل انڈیا مجلس اتحادالمسلمین کے سابق ریاستی صدر جناب سید معین کی ہدایت پر ناندیڑ۔واگھالہ شہرمیونسپل کارپوریشن (N.W.S.M.C) کے کمشنر کو ایک تحریری درخواست پیش کی ہے۔ درخواست میں انہوں نے بتایا کہ برج کے دونوں اطراف سڑک کی حالت نہایت خستہ ہے، اور مسلسل حادثات کے باعث علاقے کے لوگ پریشانی کا سامنا کر رہے ہیں۔انہوں نے کمشنر سے پرزور مطالبہ کیا کہ ممتا کالونی (محمدیہ مسجد کے سامنے) سے عبید ریذیڈنسی تک برِج کے دونوں طرف سڑک کی فوری مرمت کی جائے تاکہ آئندہ کسی بڑے حادثے کو روکا جا سکے اور مقامی شہریوں کو ریلیف مل سکے۔عبدالرحیم پٹیل نے کہا کہ عوامی سہولت اور تحفظ کے پیشِ نظر یہ مرمت نہایت ضروری ہے اور وہ امید کرتے ہیں کہ میونسپل انتظامیہ جلد اس جانب عملی قدم اٹھائے گی۔