امبیڈکروادی مشن کی جانب سے ریڈیئنٹ انسٹی ٹیوٹ کے تعلیمی خدمات کا اعتراف اور اعزاز

ناندیڑ:8؍اگست(راست) — ایک قابلِ قدر اور حوصلہ افزا اقدام کے طور پر امبیڈکروآدی مشن نے ریڈیئنٹ انسٹی ٹیوٹ آف فاؤنڈیشن اسٹڈیز، ناندیڑ کو اس کی شاندار تعلیمی خدمات اور معاشرہ و قوم کے روشن مستقبل کی تشکیل میں قابلِ ذکر کردار کے اعتراف میں اعزاز سے نوازا۔اتوار کے روز منعقدہ خصوصی "تعلیمی انقلاب کانفرنس” میں مسٹر دیپک قدم (بانی و چیئرمین، امبیڈکروآدی مشن)، مسٹر اویناش کمار (سپرنٹنڈنٹ آف پولیس، ایس پی ناندیڑ)، رکن پارلیمنٹ مسٹر چوہان اور فاروق احمد نائب صدر، ونچت بہوجن اگھاڑی مہاراشٹر، مہمانِ خصوصی کے طور پر شریک ہوئے۔ یہ پروگرام مسلمانوں کی تعلیمی صورتحال، نمائندگی اور مختلف میدانوں میں مواقع اور تیاری کے ساتھ شکریے، خلوص اور ریڈیئنٹ انسٹی ٹیوٹ کی علمی خدمات اور طلباء و کے علمی کارناموں اور کامیابیوں کے اعتراف سے معمور تھا۔تعلیمی میدان میں ریڈینٹ انسٹی ٹیوٹ کی حوصلہ افزائی کے طور پر، امبیڈکروآدی مشن کی جانب سے یو پی ایس سی کی تیاری کے لیے 25,000 روپے مالیت کی کتابیں ریڈیئنٹ انسٹی ٹیوٹ کو تحفہ کے طور پر پیش کی گئیں تاکہ طلبہ اعلیٰ تعلیم اور سول سروسز کے میدان میں مزید آگے بڑھ سکیں۔مسٹر ایس ایم صمیـم (منیجنگ ڈائریکٹر، ریڈیئنٹ انسٹی ٹیوٹ آف فاؤنڈیشن اسٹڈیز) اور مسٹر الطاف حسین صاحب کو انتھک محنت، معیاری تعلیم کے فروغ اور علم کے ذریعے قوم کی تعمیر کے عزم پر خصوصی طور پر سراہا گیا۔ٹیم ریڈیئنٹ نے اپنے دلی تشکر کا اظہار کرتے ہوئے مسٹر دیپک قدم اور پوری امبیڈکروآدی مشن ٹیم کا شکریہ ادا کیا جنہوں نے طلبہ کی علمی ترقی اور تعلیم کے فروغ کے لیے اپنی قیمتی خدمات پیش کیں۔یہ کانفرنس ایک مشترکہ وژن کی عکاسی کرتی ہے — ایک باشعور، تعلیم یافتہ اور سماجی طور پر بیدار نسل کی تشکیل کی سمت ایک اہم قدم جو ڈاکٹر امبیڈکر کے ایک انصاف پسند اور روشن خیال معاشرے کے خواب کی تعبیر کی جانب پیش رفت ہے۔