عید میلاد النبی ﷺ کے موقع پر دھرم آباد میں خون کے عطیہ کیمپ کو شاندار پذیرائی

دھرم آباد:6؍ستمبر (نامہ نگار)‘‘خون کا عطیہ سب سے بڑا عطیہ ہے‘‘ اس خیال سے متاثر ہوکر دھرم آباد کے مسلم سماج کی جانب سے حضرت محمد ﷺ کے 1500 ویں عید میلاد کے موقع پر، جمعہ 5 ستمبر 2025 کو صبح 10 بجے جامع مسجد کے سامنے ایک عظیم خون کے عطیہ کیمپ کا انعقاد کیا گیا۔اس کیمپ کو شاندار پذیرائی ملی اور کل 267 رضاکاروں نے خون عطیہ کرکے سماج کے تئیں اپنی ذمہ داری نبھائی۔اس پروگرام کی صدارت نائب سب ڈویژنل پولیس افسر دسرتھ پاٹل نے کی۔ بطور مہمانِ خصوصی میونسپل کونسل کے چیف آفیسر گواھنے، پولیس انسپکٹر سداشیو بھڈیکر، دیہی اسپتال کے میڈیکل سپرنٹنڈنٹ ڈاکٹر وینُو گوپال پنڈت، دھرم آباد ایجوکیشن سوسائٹی کے سیکریٹری ڈاکٹر کمل کشور کاکانی، سابقہ میونسپل صدر بننالی کر اور نیلاور، سابقہ کونسلر ورنی ناگ بھوشن، سرکاری ٹھیکیدار مویجو الدین کرخیلی کر، سابقہ کونسلر سمیر احمد، یونس خان، شیو سینا (اُباٹھا) کے نائب ضلع پرمُکھ گنیش گری، صحافی کرشنا تمّا پورے، مراٹھی جرنلسٹ ایسوسی ایشن کے صدر سدھرشن واگھمارے، سبکدوش میڈیکل آفیسر ڈاکٹر اقبال شیخ، ڈاکٹر لکشمی نارائن کشوروار، سنجے پوار، ڈاکٹر یوسف پٹھان اور دیگر معززین موجود تھے۔تعلقہ میں پہلی مرتبہ عید میلاد النبی ﷺ کے موقع پر خون کے عطیہ کیمپ کا انعقاد ہوا، جس میں پولیس افسران و ملازمین، سرکاری ملازمین، تاجر، صحافی اور عام شہریوں نے بھرپور حصہ لیا۔اس کیمپ میں صرف مسلم سماج ہی نہیں بلکہ ہندو سماج نے بھی دل کھول کر خون عطیہ کیا۔تمام خون کے عطیہ دہندگان کو پھول مالا، سند اور یادگاری نشان پیش کرکے ان کا اعزاز کیا گیا۔ یہ خون ڈاکٹر شنکر راو چوہان گورنمنٹ میڈیکل کالج و اسپتال وشنوپوری، ناندیڑ نے جمع کیا۔کیمپ کا ابتدائی خطاب سید ساجد ہاشمی نے کیا۔ اس موقع پر ہاشمی سید عبد الساجد نے حضرت محمد ﷺ کے کردار اور ان کی زندگی کے مثالی پہلوؤں پر روشنی ڈالی۔ نظامت طاہر پٹھان نے کی اور شکریہ نوید احمد نے ادا کیا۔اس کیمپ کو کامیاب بنانے کے لئے مسلم سماج کے بے شمار نوجوانوں نے انتھک محنت کی۔