راج ٹھاکرے کے خلاف سپریم کورٹ میں پی آئی ایل، غیر مراٹھی شہریوں پر حملوں پر کارروائی کا مطالبہ

نئی دہلی، 19 جولائی:مہاراشٹر نو نرمان سینا (ایم این ایس) کے سپریمو راج ٹھاکرے کے خلاف سپریم کورٹ میں ایک پی آئی ایل دائر کی گئی ہے۔ ایڈوکیٹ گھنشیام اپادھیائے نے یہ عرضی دائر کی ہے، جس میں راج ٹھاکرے اور ان کی پارٹی کے کارکنوں کے خلاف مقدمہ درج کرنے کی ہدایت کی مانگ کی گئی ہے۔ عرضی گزار گھنشیام اپادھیائے نے کہا کہ اس سے قبل انہوں نے ہندی زبان کے معاملے پر غیر مراٹھی شہریوں پر حملوں کے خلاف حکام کو شکایت بھیجی تھی، لیکن کوئی کارروائی نہیں کی گئی۔ اپادھیائے کا کہنا ہے کہ حکام سے کئی بار شکایت کرنے کے باوجود راج ٹھاکرے اور ان کی پارٹی کے کارکنوں کے خلاف کوئی ایف آئی آر درج نہیں کی گئی، جس کی وجہ سے انہیں عدالت سے رجوع کرنا پڑا۔ درخواست میں الزام لگایا گیا ہے کہ راج ٹھاکرے نے مراٹھی زبان کے نام پر غیر مراٹھی شہریوں پر حملوں کو جواز فراہم کرنے کی کوشش کی ہے۔ درخواست میں، راج ٹھاکرے، ان کے کزن اور شیو سینا (یو بی ٹی) کے رہنما ادھو ٹھاکرے کی طرف سے 5 جولائی کو منعقد کی گئی وجے ریلی کا حوالہ دیتے ہوئے، دعویٰ کیا گیا ہے کہ راج ٹھاکرے نے مراٹھی نہ بولنے والوں کی پٹائی کا جواز پیش کیا۔ درخواست گزار نے دعویٰ کیا ہے کہ راج ٹھاکرے نے سیاسی فائدے کے لیے مراٹھی زبان کا مسئلہ اٹھایا ہے، تاکہ آنے والے بی ایم سی انتخابات میں اس کا فائدہ اٹھایا جاسکے۔ آپ کو بتاتے چلیں کہ ممبئی میں مراٹھی اور ہندی زبان کا تنازعہ تھمنے کا نام نہیں لے رہا ہے۔ راج ٹھاکرے کے حامیوں کی جانب سے غیر مراٹھی بولنے والوں کو مارنے کے کئی واقعات سامنے آئے ہیں۔ حال ہی میں ایم این ایس لیڈر کے بیٹے نے شراب کے نشے میں متاثر راج شری مورے کے ساتھ بدتمیزی کی۔ اس سے قبل ایک دکاندار کو مراٹھی بولنے پر مارا پیٹا گیا تھا۔ مار پیٹ کرنے والوں نے اپنے گلے میں راج ٹھاکرے کی مہاراشٹر نونرمان سینا (ایم این ایس) سے وابستہ اسکارف پہن رکھے تھے۔