ناندیڑ تعلقہ میں مردم شماری 2027 کے عملی کام کا آج سے آغاز

ناندیڑ:15؍مئی ( نمائندہ اعتبار) بھارتی مردم شماری 2027 کے تحت گھر فہرست سازی اور گھر شماری مہم کے پیشِ نظر تحصیل آفس ناندیڑ کے تحت تمام شمار کنندگان اور سپروائزرس کی آخری تربیتی نشست شنکر راؤ چوہان آڈیٹوریم میں پُرجوش ماحول میں منعقد ہوئی۔ دیہی علاقوں میں عملی مردم شماری کا آغاز کل سے کیا جا رہا ہے اور انتظامیہ نے اس کے لیے تمام تیاریاں مکمل کر لی ہیں۔اس تربیت میں مردم شماری کے دوران درکار مختلف امور پر تفصیلی رہنمائی فراہم کی گئی۔ خصوصاً ’’منصوبہ جاتی رہنما نقشہ‘‘ درست طریقے سے کیسے تیار کیا جائے، گاؤں کے ہر گھر کا اندراج کس طرح کیا جائے، نیز گھروں کی نمبرنگ اور جغرافیائی ترتیب کیسے برقرار رکھی جائے، اس بارے میں عملی مثالوں کے ساتھ معلومات دی گئیں۔اس کے علاوہ مرکزی حکومت کے “HLO App” کے استعمال کے ذریعے ڈیجیٹل طریقے سے معلومات درج کرنا، معلومات اپلوڈ کرنا، خود شماری آئی ڈی کی جانچ کرنا اور آن لائن عمل کے دوران پیش آنے والی دشواریوں کو حل کرنے سے متعلق بھی مفصل تربیت دی گئی۔اس پروگرام میں ضلع کلکٹر راہل کڑدیلے نے خصوصی شرکت کرتے ہوئے تمام شمار کنندگان اور سپروائزرس کی رہنمائی کی۔ انہوں نے کہا کہ مردم شماری ملک کی ترقی کی بنیاد ہے، اس لیے ہر ملازم کو ذمہ داری، درستگی اور شفافیت کے ساتھ کام کرنا چاہیے۔ انہوں نے واضح کیا کہ حکومت کی مختلف اسکیمیں، ترقیاتی منصوبے اور وسائل کی منصوبہ بندی مردم شماری سے حاصل شدہ معلومات پر منحصر ہوتی ہے، اس لیے ہر گھر تک پہنچ کر درست معلومات جمع کرنا انتہائی اہم ہے۔اس موقع پر خود شماری کے عمل میں 100 فیصد کامیابی حاصل کرنے والے واڑی کڑدیل اور گنڈیگاؤں کے شمار کنندگان اور سپروائزرس کی ضلع کلکٹر کے ہاتھوں خصوصی ستائش کی گئی۔ انتظامیہ کے مطابق خود شماری مکمل ہونے کی وجہ سے ہر خاندان کو علیحدہ خود شماری آئی ڈی حاصل ہوئی ہے، جس سے عملی مردم شماری کا عمل مزید آسان اور تیز رفتار ہوگا۔تحصیلدار ناندیڑ سنجے وارکڑ نے پورے پروگرام کی منصوبہ بندی نہایت منظم انداز میں کی، جبکہ ریذیڈنٹ نائب تحصیلدار سپنیل دگلوار نے پروگرام کی مؤثر نظامت انجام دی۔ پروگرام میں موجود افسران، ملازمین اور تربیت حاصل کرنے والوں نے مردم شماری مہم کو کامیاب بنانے کے عزم کا اظہار کیا۔ناندیڑ تعلقہ کے دیہی علاقوں میں کل سے شروع ہونے والی اس مردم شماری مہم کے باعث انتظامیہ کو درست آبادیاتی معلومات حاصل ہوں گی، جس سے ترقیاتی منصوبوں کو مزید رفتار ملے گی۔