ناندیڑ۔ ممبئی اور ٹنک پور۔ ناندیڑ کے درمیان دو نئی ایکسپریس ٹرینوں کا افتتاح

ناندیڑ:6؍جولائی ( نامہ نگار) مرکزی وزیرِ ریلوے اشونی ویشنو نے آج، 6 جولائی 2026ء کو ویڈیو کانفرنسنگ کے ذریعے ناندیڑ۔ممبئی اور ٹنک پور۔ناندیڑ کے درمیان دو نئی ایکسپریس ٹرینوں کو ہری جھنڈی دکھا کر روانہ کیا۔ اس موقع پر ٹنک پور۔پیلی بھیت ریل سروس کو بھی شاہجہاں پور تک توسیع دی گئی۔ تقریب سے مہاراشٹر کے وزیرِ اعلیٰ دیویندر فڈنویس اور اتراکھنڈ کے وزیرِ اعلیٰ پشکر سنگھ دھامی نے ویڈیو پیغام کے ذریعے خطاب کیا۔اس موقع پر ناندیڑ، ٹنک پور اور پیلی بھیت ریلوے اسٹیشنوں پر خصوصی تقریبات کا انعقاد کیا گیا۔ ٹنک پور میں مرکزی وزیرِ مملکت رونیت سنگھ، اجے ٹمٹا اور دیگر عوامی نمائندے موجود تھے، جبکہ پیلی بھیت میں مرکزی وزیرِ مملکت جتین پرساد اور دیگر معززین نے شرکت کی۔ناندیڑ ریلوے اسٹیشن پر منعقدہ تقریب میں رکنِ پارلیمان اشوک راؤ شنکر راؤ چوہان، ناندیڑ۔واگھالہ میونسپل کارپوریشن کی میئر کویتاسنتوش مُڑے، رکنِ پارلیمان ڈاکٹر اجیت مادھو راؤ گوپچھڑے، رویندر وسنت راؤ چوہان، بلونت بسونت وانکھیڑے، رکنِ قانون ساز کونسل امرناتھ اننت راؤ راجورکر سمیت متعدد لیڈران و عہدیداران شریک ہوئے۔ اس کے علاوہ ساؤتھ سینٹرل ریلوے کے جنرل منیجر سنجے کمار شریواستو، ناندیڑ ڈویژن کے ڈویژنل ریلوے منیجر پردیپ کاملے اور دیگر ریلوے افسران بھی موجود تھے۔تقریب سے خطاب کرتے ہوئے مرکزی وزیرِ ریلوے اشونی ویشنو نے کہا کہ ٹنک پور۔ناندیڑ ایکسپریس کا آغاز عوام کے ایک دیرینہ مطالبے کی تکمیل ہے۔ اس نئی ریل سروس سے اتراکھنڈ اور مہاراشٹر کے درمیان ریلوے رابطہ مزید مضبوط ہوگا اور ناندیڑ میں واقع مقدس تخت سچ کھنڈ شری حضور صاحب گوردوارہ جانے والے عقیدت مندوں کو بڑی سہولت حاصل ہوگی۔انہوں نے مزید کہا کہ ناندیڑ۔ممبئی ایکسپریس کے آغاز سے مراٹھواڑہ کے بالخصوص واشم، ہنگولی اور بسمت کے مسافروں کو ممبئی تک آسان اور براہِ راست ریلوے رابطہ میسر آئے گا۔انہوں نے وزیرِ اعظم نریندر مودی کی قیادت میں گزشتہ بارہ برسوں کے دوران ہندوستانی ریلوے کی ترقی کا ذکر کرتے ہوئے بتایا کہ اس عرصے میں 37 ہزار کلومیٹر سے زائد نئے ریلوے ٹریک بچھائے گئے ہیں، جبکہ ریلوے نیٹ ورک کا 99.6 فیصد برقی کاری مکمل ہوچکی ہے۔ انہوں نے کہا کہ بلٹ ٹرین پروجیکٹ اور ڈیڈی کیٹیڈ فریٹ کوریڈورز (Dedicated Freight Corridors) پر تیزی سے کام جاری ہے۔ متوسط طبقے اور معاشی طور پر کمزور طبقات کو سستا اور محفوظ سفر فراہم کرنے کے لیے مختلف ریاستوں میں مسلسل نئی ریل سروسز شروع کی جا رہی ہیں۔ انہوں نے بتایا کہ رواں سال جون تک موسمِ گرما میں 15 ہزار سے زائد خصوصی ٹرینیں چلائی گئیں، جبکہ دیوالی اور چھٹھ تہوار کے دوران تقریباً 12 ہزار خصوصی ٹرینیں چلائی گئیں۔مہاراشٹر کے وزیرِ اعلیٰ دیویندر فڈنویس نے دونوں نئی ریلوے سروسز کے آغاز پر عوام کو مبارک باد پیش کرتے ہوئے کہا کہ ناندیڑ۔ممبئی ایکسپریس سے مراٹھواڑہ کے خصوصاً بسمت، ہنگولی، واشم، اکولہ اور ناندیڑ اضلاع کے مسافروں کو ممبئی تک براہِ راست اور آسان ریلوے رابطہ حاصل ہوگا۔ اسی طرح ٹنک پور۔ناندیڑ ایکسپریس سے اتراکھنڈ اور اتر پردیش کے عقیدت مندوں کے لیے ناندیڑ کے مقدس سچ کھنڈ گوردوارہ تک سفر مزید سہل ہوجائے گا۔اتراکھنڈ کے وزیرِ اعلیٰ پشکر سنگھ دھامی نے کہا کہ ٹنک پور۔ناندیڑ ایکسپریس سے مذہبی عقیدت، سیاحت اور ترقی کو فروغ ملے گا اور اتراکھنڈ و مہاراشٹر کے درمیان تعلقات مزید مضبوط ہوں گے۔ انہوں نے کہا کہ یہ نئی ریل سروس اہم مقامات کے درمیان رابطے کو مزید مستحکم کرے گی۔مرکزی وزیرِ مملکت برائے ریلوے رونیت سنگھ نے وزیرِ اعظم نریندر مودی اور مرکزی وزیرِ ریلوے اشونی ویشنو کا شکریہ ادا کرتے ہوئے کہا کہ عوام کی دیرینہ توقعات کو پورا کرتے ہوئے یہ نئی ریلوے سروسز شروع کی گئی ہیں۔ انہوں نے کہا کہ ٹنک پور۔ناندیڑ اور ناندیڑ۔ممبئی ایکسپریس سے ثقافتی اور روحانی روابط کو تقویت ملے گی اور عوام کو بہتر سفری سہولیات حاصل ہوں گی۔ناندیڑ ریلوے اسٹیشن پر منعقدہ تقریب میں رکنِ پارلیمان اشوک راؤ شنکر راؤ چوہان نے کہا کہ ان دونوں نئی ریل سروسز سے ناندیڑ اور مراٹھواڑہ کا ملک کے اہم شہروں سے ریلوے رابطہ مزید مضبوط ہوگا۔ انہوں نے کہا کہ گزشتہ چند برسوں میں عوام کے تعاون اور مؤثر قیادت کی بدولت ناندیڑ کے ریلوے بنیادی ڈھانچے میں نمایاں بہتری آئی ہے۔ناندیڑ۔واگھالہ میونسپل کارپوریشن کی میئر کویتا سنتوش مُڑے نے کہا کہ ناندیڑ۔ممبئی ایکسپریس طلبہ، عقیدت مندوں، تاجروں اور مختلف شعبوں سے تعلق رکھنے والے مسافروں کے لیے انتہائی مفید ثابت ہوگی۔ انہوں نے کہا کہ ان نئی ریلوے خدمات سے علاقے کی سماجی اور معاشی ترقی کو بھی فروغ ملے گا۔رکنِ پارلیمان ڈاکٹر اجیت مادھو راؤ گوپچھڑے نے وزیرِ اعظم نریندر مودی اور مرکزی وزیرِ ریلوے اشونی ویشنو کا شکریہ ادا کرتے ہوئے کہا کہ ناندیڑ۔ممبئی اور ٹنک پور۔ناندیڑ ایکسپریس ٹرینوں کے آغاز سے ناندیڑ کا مہاراشٹر اور شمالی ہندوستان کے اہم شہروں سے رابطہ مزید مضبوط ہوگا۔رکنِ پارلیمان رویندر وسنت راؤ چوہان نے کہا کہ ناندیڑ۔ممبئی اور ناندیڑ۔ٹنک پور ایکسپریس سے ناندیڑ کے رابطے اور سیاحت کو مزید فروغ ملے گا۔ انہوں نے کہا کہ ناندیڑ حیدرآباد، ممبئی اور ناگپور کو جوڑنے والا ایک اہم مرکز ہے، اس لیے مسافروں کی سہولت کے پیشِ نظر مزید ریلوے خدمات شروع کی جانی چاہئیں۔اس سے قبل جنوبی وسطی ریلوے کے جنرل منیجر سنجے کمار شریواستو نے استقبالیہ خطاب پیش کیا۔