مسجدِ نمرہ کل یومِ عرفہ کے موقع پر لاکھوں حجاجِ کرام کے استقبال کے لیے تیار

مکہ مکرمہ :26؍مئی:سعودی وزارتِ امورِ اسلامی، دعوت و ارشاد نے حج سیزن 1447 ہجری میں یومِ عرفہ کے دوران لاکھوں کی تعداد میں اللہ کے مہمانوں کے استقبال کی تیاریوں کے سلسلے میں میدان عرفات میں واقع مسجدِ نمرہ میں اپنی آپریشنل، فنی، تکنیکی اور توسیعی خدمات کے مربوط نظام کو مزید بڑھا دیا ہے۔ اس کا مقصد ایک ایسا پر سکون اور محفوظ ایمانی ماحول فراہم کرنا ہے جس میں حجاج کرام پورے آرام اور اطمینان کے ساتھ اپنے مناسک ادا کر سکیں۔مسجدِ نمرہ مقامت مقدسہ کی بڑی مساجد میں سے ایک ہے اور اس کا یومِ عرفہ کے ساتھ گہرا تعلق ہے۔ یہی وجہ ہے کہ گذشتہ سالوں کے دوران اس کی آپریشنل صلاحیت کو بڑھانے اور حجاج کے بڑے اژدہام کو سنبھالنے کے لیے یہاں متعدد نوعیتی ترقیاتی منصوبے مکمل کیے گئے ہیں۔حج سیزن کے دوران حجاج کی بڑی تعداد کے استقبال اور اللہ کے گھروں کی دیکھ بھال کے جامع منصوبے کے تحت وزارت نے مسجد میں 1 لاکھ 25 ہزار مربع میٹر سے زائد رقبے پر اعلی معیار کا قالین بچھایا ہے۔ان ترقیاتی منصوبوں میں شدید گرمی اور لو کے اثرات کو کم کرنے کے لیے جدید حل تلاش کیے گئے ہیں، جن میں سب سے نمایاں مسجد کے عقبی صحن میں 19 چھتریوں کی تنصیب ہے جو درجہ حرارت کو تقریبا 10 ڈگری سینٹی گریڈ تک کم کرنے میں مدد دیتی ہیں، اس کے ساتھ ساتھ فرش پر دھوپ کو منعکس کرنے والے مواد کا پینٹ بھی کیا گیا ہے۔علاوہ ازیں ارد گرد کے صحنوں میں موسم کو خوشگوار بنانے کے لیے ہائی پریشر پمپوں سے چلنے والے 117 مسٹ فین (پانی کی پھوار چھوڑنے والے پنکھے) نصب کیے گئے ہیں، جو درجہ حرارت کو اوسطا 9 ڈگری سینٹی گریڈ تک کم کرنے میں مدد گار ثابت ہوتے ہیں۔وزارت نے مسجد کے اندر ایئر کنڈیشننگ اور وینٹیلیشن کے نظام کو بھی بہتر بنایا ہے، جس کے لیے کاربن ڈائی آکسائیڈ کی سطح کی نگرانی اور مسجد کے اندر گھنٹے میں دو بار ہوا کو تبدیل کرنے کے لیے سینٹرل کنٹرول سسٹم کو اپ ڈیٹ کیا گیا ہے، تاکہ اندرونی ماحول کے معیار اور نمازیوں کی صحت کو برقرار رکھا جا سکے۔مسجد اور اس کے صحنوں میں پینے کے پانی کی فراہمی کے لیے پانی کو ٹھنڈا کرنے والے 70 یونٹس نصب کیے گئے ہیں جن کی گنجائش فی گھنٹہ 1 لاکھ 40 ہزار حجاج تک پہنچتی ہے۔ترقیاتی کاموں میں بجلی اور سانڈ سسٹم کے انفراسٹرکچر کی اپ گریڈیشن، ایل ای ڈی لائٹس کی تنصیب اور بارش کے پانی کی نکاسی کے نظام کے ساتھ ساتھ مسجد کو ایک جدید سانڈ سسٹم اور سکیورٹی مانیٹرنگ کیمروں سے لیس کرنا شامل ہے۔شدید رش کے اوقات میں آمد و رفت کی روانی اور ہجوم کے بہترین انتظام کو یقینی بنانے کے لیے داخل ہونے اور باہر نکلنے کے راستوں کو 72 دروازوں کے ذریعے منظم کیا گیا ہے۔آگاہی اور رہنمائی کے شعبے میں وزارت نے مسجد کے اندر آگاہی کے پیغامات نشر کرنے کے لیے 150 ڈیجیٹل اسکرینیں فعال کر کے رہنمائی کی خدمات کو تیز کر دیا ہے۔ اس کے علاوہ مختلف زبانوں میں شرعی سوالات کے جوابات دینے کے لیے 10 وڈیو کالنگ پلیٹ فارم بھی فراہم کیے گئے ہیں۔وزارت نے مسجد اور جبلِ رحمت کے پاس اسلامی آگاہی کے کیبنز کو بھی متحرک کیا ہے، جہاں حجاج کی خدمت کے لیے 200 مبلغین اور 50 مترجمین کو نامزد کیا گیا ہے، جبکہ 300 مبلغین کے ذریعے مقامی حجاج کے خیموں کے اندر بھی دعوتی پروگرام منعقد کیے جا رہے ہیں۔وزارت نے تاکید کی ہے کہ یہ تمام کام مقامات مقدسہ کی مساجد میں تیاری کی سطح کو بلند کرنے اور اللہ کے مہمانوں کی خدمت کے لیے تمام ممکنہ وسائل کو بروئے کار لانے کے تزویراتی منصوبے کا حصہ ہیں، تاکہ یومِ عرفہ کے دوران حجاج کرام کے ایمانی تجربے کے معیار کو مزید بہتر بنایا جا سکے۔