कया अप भी अपने न्यूज़ पेपर की वेब साईट बनाना चाहते है या फिर न्यूज़ पोर्टल बनाना चहाते है तो कॉल करें 9860450452 / 9028982166 /9595154683

سکندر خان کی موت: انسانیت، طبی اخلاقیات اور انصاف کی آزمائش

دلت خاتون کو خون عطیہ کرنے ہسپتال پہنچے سکندر خان خود تشدد کا شکار ہوکر زندگی کی بازی ہار گئے؛ رفیع گنج کا یہ واقعہ سماجی رواداری، طبی اخلاقیات اور انتظامی جواب دہی پر کئی سوالات کھڑے کرتا ہے

از قلم: ڈاکٹر سید تابش امام
رابطہ۔۔۹۹۳۴۹۳۳۹۹۲

بہار کے ضلع اورنگ آباد کے رفیع گنج میں سکندر خان کی المناک موت نے انسانی ہمدردی، سماجی رواداری اور قانون کی حکمرانی کے حوالے سے کئی سنگین سوالات کھڑے کردیے ہیں۔ اہل خانہ کے مطابق، سکندر خان ایک دلت خاتون کو خون عطیہ کرنے کے لیے ہسپتال پہنچے تھے، لیکن وہاں پیش آنے والے ایک تنازعے کے بعد مبینہ طور پر ان کی اس قدر پٹا ئی کی گئی کہ وہ شدید زخمی ہوگئے۔ چار دنوں تک زندگی اور موت کی کشمکش میں مبتلا رہنے کے بعد بالاآخر 14 نومبر کو پٹنہ کے میڈانتا ہسپتال میں ان کی موت ہوگئی۔ کسی دوسرے کی زندگی بچانے کے جذبے سے ہسپتال پہنچنے والے شخص کا خود تشدد کا شکار ہوکر جان گنوا دینا محض ایک فوجداری واقعہ نہیں، بلکہ ہمارے اجتماعی ضمیر کے لیے ایک بڑا سوال ہے۔
اورنگ آباد ضلع کے چرکوپا گاؤں کے باشندہ ۴۵ سالہ سکندر خان کے۔ہمراہ یہ واقعہ 10 نومبر کی شب رفیع گنج کے نونیا ٹیلہ میں واقع کے پی میموریل ہسپتال میں پیش آیا۔ بتایا جاتا ہے کہ وہاں زیر علاج ایک دلت حاملہ خاتون کو خون عطیہ کرنے سکندر خان پہنچے تھے۔ اسی دوران خاتون کے علاج اور اسے دوسرے ہسپتال منتقل کرنے کے معاملے پر ہوئی بحث مبینہ طور پر تشدد میں تبدیل ہوگئی۔
متوفی کے بھائی صابر عالم خان کی شکایت کے مطابق، ہسپتال کے مالک ڈاکٹر رنجیت کمار یادو اور ان کے ساتھیوں نے سکندر خان کو ایک کمرے میں بند کرکے لاٹھی، ہاکی اسٹک اور لوہے کی سلاخوں سے پٹائی کی۔ اس حملے میں ان کے سر اور جسم کے دیگر حصوں پر شدید چوٹیں آئیں۔ شکایت میں رنجے کمار، سورو کمار اور دیگر افراد کو بھی ملزم نامزد کیا گیا ہے۔ تاہم واقعے کی مکمل تفصیلات اور ملزمان کے کردار کا حتمی تعین تفتیش اور عدالتی کارروائی کے بعد ہی ہوسکے گا۔
شدید زخمی حالت میں سکندر خان کو پہلے رفیع گنج کے سرکاری ہسپتال لے جایا گیا، جہاں ابتدائی طبی امداد کے بعد انہیں گیا کے مگدھ میڈیکل کالج و ہسپتال منتقل کیا گیا۔ حالت تشویشناک ہونے پر بعد میں پٹنہ کے میڈانتا ہسپتال ریفر کردیا گیا، جہاں 14 نومبر کو انہوں نے دم توڑ دیا۔ ان کی موت کی خبر پھیلتے ہی علاقے میں غم و غصے کی لہر دوڑ گئی۔
اس واقعے کا سب سے تشویش ناک پہلو یہ ہے کہ مبینہ تشدد کا مقام ایک ہسپتال ہے۔ وہی ہسپتال جہاں انسان بیماری اور بے بسی کی حالت میں علاج اور تحفظ کی امید لے کر پہنچتا ہے۔ ڈاکٹر اور طبی عملے کا بنیادی فریضہ انسانی زندگی کا تحفظ ہے۔ علاج کے معاملے میں اختلاف ہو یا مریض کے تیماردار سے تلخی، اس کا حل گفت و شنید اور قانونی طریقۂ کار کے ذریعے تلاش کیا جانا چاہیے، نہ کہ تشدد کے ذریعے۔
اگر تحقیقات میں یہ ثابت ہوتا ہے کہ ہسپتال کے مالک اور عملے نے سکندر خان کو کمرے میں بند کرکے ان پر حملہ کیا تو یہ نہ صرف طبی اخلاقیات کی سنگین خلاف ورزی ہوگی، بلکہ ایک سنگین مجرمانہ فعل بھی قرار پائے گا۔ ڈاکٹر کا منصب کسی کو قانون سے بالاتر نہیں بناتا۔ سفید کوٹ کی حرمت اسی وقت برقرار رہ سکتی ہے جب اس سے وابستہ افراد انسانی جان اور وقار کا احترام کریں۔
محکمہ صحت کو بھی اس واقعے کا سنجیدگی سے نوٹس لینا چاہیے۔ متعلقہ ہسپتال کی رجسٹریشن، طبی سہولیات، عملے کی اہلیت اور ہنگامی حالات سے نمٹنے کے انتظامات کی جانچ ضروری ہے۔ اگر کسی قسم کی بے ضابطگی سامنے آتی ہے تو ذمہ داروں کے خلاف کارروائی ہونی چاہیے۔ علاج گاہوں میں مریضوں اور ان کے تیمارداروں کا تحفظ محض انتظامی ضابطہ نہیں، بلکہ ایک بنیادی انسانی ضرورت ہے۔
خون کا کوئی مذہب اور ذات نہیں ہوتی:
سکندر خان کے واقعے میں دلت خاتون کو خون عطیہ کرنے کا پہلو خصوصی اہمیت رکھتا ہے۔ خون کا عطیہ انسانی خدمت کی ایسی مثال ہے جس میں مذہب، ذات، زبان اور سماجی حیثیت کی کوئی اہمیت نہیں رہ جاتی۔ خون کی ضرورت میں مبتلا شخص کے لیے سب سے اہم اس کی زندگی ہوتی ہے، نہ کہ عطیہ دینے والے کی شناخت۔
کثیر مذہبی اور کثیر تہذیبی ملک ہندسان میں یہی جذبہ مشترکہ تہذیب اور باہمی اخوت کی بنیاد ہے۔ مختلف مذاہب اور طبقات کے لوگ صدیوں سے ایک دوسرے کے دکھ درد میں شریک ہوتے آئے ہیں۔ کسی بیمار کو خون دینا، حادثے کے شکار شخص کی مدد کرنا اور ضرورت مند کے ساتھ کھڑا ہونا اسی انسانی رشتے کی علامت ہے جو ہر سماجی اور مذہبی تفریق سے بلند ہے۔
اگر سکندر خان واقعی ایک دلت خاتون کو خون عطیہ کرنے کے لیے ہسپتال پہنچے تھے تو ان کا یہ عمل انسانی ہمدردی کی قابل قدر مثال ہے۔ افسوس ناک امر یہ ہے کہ دوسرے کی زندگی بچانے کے لیے پہنچنے والا شخص خود تشدد کا شکار ہوگیا۔ یہ واقعہ ہمیں اپنی سماجی قدروں اور باہمی احترام کے رویوں کا جائزہ لینے پر مجبور کرتا ہے۔
اس سانحے کو کسی مذہب یا ذات کے خلاف نفرت پھیلانے کا ذریعہ بنانے کے بجائے انسانی اقدار کے تحفظ کی آواز بنانا چاہیے۔ سکندر خان کو انصاف دلانا کسی ایک برادری کا مسئلہ نہیں، بلکہ ہر اس شہری کا مطالبہ ہے جو ایک محفوظ اور منصفانہ معاشرے کا خواہاں ہے۔
اس معاملے میں رفیع گنج تھانے کی ابتدائی کارروائی بھی سوالات کے دائرے میں ہے۔ اطلاعات کے مطابق، 11 نومبر کو متوفی کے بھائی کی شکایت پر مقدمہ درج کیا گیا تھا۔ ابتدا میں حملے اور اقدام قتل سمیت مختلف الزامات کے تحت کارروائی ہوئی۔ سکندر خان کی موت کے بعد مقدمے میں قتل سے متعلق دفعہ 103(1) بھی شامل کی گئی۔
پولیس کے مطابق، ہسپتال کے مالک ڈاکٹر رنجیت کمار یادو اور کمپاؤنڈر سورو کمار کو گرفتار کرکے عدالتی تحویل میں بھیج دیا گیا، جبکہ دیگر ملزمان کی گرفتاری کے لیے چھاپے ماری جاری ہے۔
مبینہ لاپروائی کے الزام میں رفیع گنج کے تھانہ انچارج شمبھو پرساد کو لائن حاضر کرکے انسپکٹر رام جی پرساد کو تھانے کی ذمہ داری سونپی گئی۔ تاہم محض افسر کے تبادلہ سے معاملہ ختم نہیں ہوجاتا۔ بلکہ یہ معلوم کرنا بھی ضروری ہے کہ پولیس کو واقعے کی اطلاع کب ملی، کارروائی میں تاخیر کیوں ہوئی اور تشدد روکنے کے لیے کیا اقدامات کیے گئے۔
واقعے کا ایک اور افسوس ناک پہلو 12 نومبر کو رفیع گنج میں پیش آیا، جب سکندر خان کی موت کی افواہ پھیلنے کے بعد مشتعل ہجوم نے ہسپتال پہنچ کر توڑ پھوڑ کی، ایک ایمبولینس کو آگ لگادی اور رفیع گنج۔گیا سڑک پر آتش زنی کرکے آمد و رفت متاثر کردی۔ پولیس پر پتھراؤ کی بھی اطلاعات سامنے آئیں۔ حالات پر قابو پانے کے لیے اضافی فورس طلب کرنی پڑی اور کئی گھنٹوں کی کوشش کے بعد جام ختم کرایا جاسکا۔
بلا شبہ سکندر خان کے ساتھ مبینہ تشدد کے خلاف احتجاج اور انصاف کا مطالبہ ہر شہری کا حق ہے، لیکن توڑ پھوڑ اور آتش زنی کسی صورت درست نہیں۔ ایک جرم کے جواب میں دوسرا جرم انصاف کا متبادل نہیں ہوسکتا۔ ضروری ہے کہ غم و غصے کو قانون کے دائرے میں رہتے ہوئے انصاف کی جدوجہد میں تبدیل کیا جائے۔یہ ہماری مشترکہ ذمہ داری ہے کہ سکندر خان کی موت کو سیاسی الزام تراشی کا موضوع بنانے کے بجائے سیاسی جماعتوں کو یہ کوشش کرنی چاہیے کہ قانون کی نظر میں ہر شہری برابر ہے۔ کسی ملزم کے سیاسی روابط اسے قانونی کارروائی سے بچانے کا ذریعہ نہیں بننے چاہئیں۔
بہار کی سیاست میں سماجی انصاف، دلت حقوق اور پسماندہ طبقات کے تحفظ کے دعوے ہمیشہ اہم رہے ہیں۔ ایسے میں عوامی نمائندوں کی ذمہ داری ہے کہ وہ رسمی تعزیتی بیانات سے آگے بڑھ کر متاثرہ خاندان کو انصاف دلانے اور تفتیش کو شفاف بنانے کے لیے عملی کردار ادا کریں۔
حکومت اور ضلعی انتظامیہ کو چاہیے کہ متوفی کے اہل خانہ کو مناسب مالی امداد اور قانونی معاونت فراہم کریں اور مقدمے کی تفتیش میں غیر ضروری تاخیر نہ ہو۔ تمام ملزمان کے خلاف شواہد کی بنیاد پر کارروائی کی جائے اور ساتھ ہی قانونی تقاضوں کی پابندی بھی یقینی بنائی جائے۔
سکندر خان کی موت کو محض ایک مقامی تنازعے یا مارپیٹ کے واقعے کے طور پر نظر انداز نہیں کیا جاسکتا۔ یہ سانحہ طبی نظام، پولیس انتظامیہ اور سماجی رویوں کے سامنے کئی بنیادی سوالات کھڑے کرتا ہے۔ کیا ہسپتال جیسی جگہ بھی عام شہری کے لیے غیر محفوظ ہوسکتی ہے؟ کیا علاج کے معاملے میں اختلاف کا جواب تشدد ہے؟ کیا قانون کی گرفت سے بچنے کے لیے سیاسی یا سماجی اثر و رسوخ استعمال کیا جاسکتا ہے؟ ان سوالات کا جواب محض بیانات سے نہیں، بلکہ شفاف تحقیقات اور مؤثر کارروائی سے ملے گا۔
کسی مہزب معاشرے کی ترقی کا اندازہ صرف سڑکوں، عمارتوں، ہسپتالوں اور تعلیمی اداروں سے نہیں لگایا جاسکتا۔ اصل معیار یہ ہے کہ وہاں انسانی جان کتنی محفوظ ہے، کمزور اور بے سہارا شخص کو کتنا تحفظ حاصل ہے اور قانون کی نظر میں ہر شہری کو یکساں حیثیت حاصل ہے یا نہیں۔
سکندر خان اب اس دنیا میں نہیں رہے، لیکن ان کی موت سے اٹھنے والے سوالات زندہ ہیں۔ دوسرے کی زندگی بچانے کے لیے خون عطیہ کرنے پہنچنے والا شخص اگر خود تشدد کا شکار ہوکر جان گنوا بیٹھے تو یہ صرف ایک خاندان کا المیہ نہیں، پورے معاشرے کے ضمیر کا امتحان ہے۔
سکندر خان کو انصاف ملنا چاہیے۔ یہ صرف ان کے اہل خانہ کا مطالبہ نہیں، بلکہ ایک ایسے انسانی معاشرے کا تقاضا ہے جہاں خون کا عطیہ دینے والے کو اپنے ہی خون سے اس کی قیمت ادا نہ کرنی پڑے۔

 

Misbah Cloth Center Advertisment

Shaikh Akram

Shaikh Akram S/O Shaikh Saleem Chief Editor Aitebar News, Nanded (Maharashtra) Mob: 9028167307 Email: akram.ned@gmail.com

Related Articles

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے