سرپرست وزیر اتل ساوے نے قانون و نظم و نسق کے حوالے سے جائزہ لیا

ناندیڑ:18؍اپریل ( نمائندہ اعتبار)ضلع میں قانون و نظم و نسق کی صورتحال کے سلسلے میں سرپرست وزیر اتل ساوے کی صدارت میں پولیس محکمہ کے ساتھ ضلع کلکٹر آفس میں آج ایک اہم میٹنگ منعقد ہوئی۔ اس موقع پر ضلع کلکٹر راہل کرڈیلے، سپرنٹنڈنٹ آف پولیس ابیناش کمار، ایڈیشنل ضلع کلکٹر رتن دیپ گائیکواڑ، ایڈیشنل سپرنٹنڈنٹ آف پولیس ارچنا پاٹل، ایڈیشنل سپرنٹنڈنٹ آف پولیس سورج گرو، سب ڈویژنل پولیس آفیسر اشوینی جگتاپ، ریزیڈنٹ ڈپٹی کلکٹر کرن امبیکر سمیت دیگر افسران موجود تھے۔سرپرست وزیر اتل ساوے نے ضلع میں حالیہ دنوں پیش آئے سنگین جرائم کے پس منظر میں ہدایت دی کہ قانون و نظم و نسق کو برقرار رکھنے کے لیے پولیس محکمہ مزید مستعدی اختیار کرے، نیز امن و امان اور عوامی سلامتی کے پیش نظر ٹھوس اقدامات کیے جائیں۔ اچانک چھاپے مار کر جرائم پر قابو پایا جائے، کومبنگ آپریشن کے ذریعے ملزمین کی تلاش کے لیے خصوصی مہم چلائی جائے اور ضلع میں جرائم کی روک تھام کے لیے مقامی خفیہ اطلاعاتی نظام کو مزید مضبوط بنایا جائے۔ شہر اور ضلع میں غیر قانونی کاروباروں پر کڑی نظر رکھی جائے اور غیر قانونی ریت نکاسی، گٹکھا، مٹکا اور منشیات کے خلاف سخت کارروائی کی جائے۔انہوں نے یہ بھی یقین دہانی کرائی کہ پولیس محکمہ کو درپیش مسائل کو حکومتی سطح پر حل کرنے کے لیے مؤثر پیروی کی جائے گی۔ سی سی ٹی وی پروجیکٹ، اسامیوں کی بھرتی، پولیس رہائشی کالونی اور پولیس کمشنری کے قیام سے متعلق تجاویز پر بھی ضروری کارروائی کی جائے گی۔ اس موقع پر سرپرست وزیر نے ناندیڑ پولیس کی جانب سے کی گئی احتیاطی کارروائیوں، خصوصاً MPDA کے تحت اقدامات، سنگین جرائم میں کمی، اسٹریٹ سیفٹی دستہ اور روزگار میلہ جیسے اقدامات کی ستائش کی۔سپرنٹنڈنٹ آف پولیس ابیناش کمار نے ضلع ناندیڑ میں جرائم کا جائزہ پیش کرتے ہوئے بتایا کہ قتل، فساد، ڈکیتی، زبردستی چوری، گھر پھوڑ، عام چوری، عصمت دری، چھیڑ چھاڑ اور اغوا جیسے جرائم میں 2024ء کے مقابلے 2025ء میں کمی درج کی گئی ہے۔ اسی طرح غیر قانونی سرگرمیوں کے خلاف کارروائی میں نمایاں اضافہ ہوا ہے۔ جنوری تا اپریل 2025 کے مقابلے جنوری تا اپریل 2026 کے دوران بھی قتل، اقدام قتل، عصمت دری، ڈکیتی، زبردستی چوری، گھر پھوڑ، چوری، زخمی کرنے، اغوا اور چھیڑ چھاڑ جیسے جرائم میں کمی دیکھی گئی ہے۔اس موقع پر ضلع پولیس سپرنٹنڈنٹ نے بتایا کہ پولیس کی جانب سے ریکارڈ یافتہ مجرموں کی فہرست تیار کی گئی ہے اور دو یا اس سے زائد مقدمات میں ملوث عادی مجرموں کی ’’2 پلس‘‘ فہرست بنا کر وقتاً فوقتاً ان کے خلاف احتیاطی کارروائی کی جا رہی ہے۔ MPDA کے تحت مجموعی طور پر 37 ملزمین کو ایک سال کے لیے جیل میں نظربند کیا گیا ہے، جس کے باعث 2025ء میں ناندیڑ ضلع (کمشنری علاقوں کے علاوہ) مہاراشٹر میں اول مقام پر رہا۔انہوں نے مزید بتایا کہ قانون و نظم و نسق کو برقرار رکھنے اور جرائم میں کمی کے لیے تشکیل دیے گئے اسٹریٹ سیفٹی اسکواڈ اور نربھیا دستہ کے بارے میں بھی تفصیلی معلومات پیش کی گئیں اور اس بات کا یقین ظاہر کیا کہ آئندہ بھی ضلع میں امن و امان برقرار رکھا جائے گا۔ناندیڑ پولیس کی جانب سے چوری شدہ اور گمشدہ موبائل فونز میں سے برآمد شدہ کل 303 موبائل، جن کی مجموعی مالیت 46,03,000 روپئے ہے، اصل مالکان کے حوالے کیے گئے۔ یہ موبائل فونز سرپرست وزیر اتل ساوے کے ہاتھوں پولیس سپرنٹنڈنٹ آفس میں منعقدہ ایک تقریب کے دوران تقسیم کیے گئے۔