تیر کے پی ایم شری اردو اسکول میں ‘طالب علم تحفظ اور شکایات ازالہ کمیٹی کا معائنہ

عثمان آباد :14؍جولائی ( راست) ضلع عثمان آباد کے ‘تیر، میں واقع پی ایم شری ضلع پریشد اردو اسکول میں ضلع پولیس ہیڈ کوارٹر کی جانب سے سب انسپکٹر (S.P.C. D.N.O) ڈاکٹر اقبال محبوب سید صاحب اور ان کے مددگار پولیس نائیک آتِش دشرتھ سارفڑے صاحب نے دورہ کیا۔ انہوں نے اسکول میں قائم ‘طالب علم تحفظ کمیٹی’ اور ‘سکھی ساوتری کمیٹی’ کے تحت کام کرنے والی ‘شکایات ازالہ کمیٹی’ کے طریقہ کار کی جانچ کی اور اس پر اطمینان کا اظہار کیا۔واضح رہے کہ اسکولوں میں طالب علم تحفظ کمیٹی، سکھی ساوتری کمیٹی اور شکایات ازالہ کمیٹی فعال ہیں اور اسکول کی سطح پر طلبا کے تحفظ اور نظم و ضبط کو برقرار رکھنے کے لیے ان کمیٹیوں کی نگرانی کی جا رہی ہے۔ طلبا کے مفاد کو مدنظر رکھتے ہوئے ایک محفوظ، خوف سے پاک اور خوشگوار ماحول پیدا کرنے کے مقصد سے ان کمیٹیوں کو تشکیل دیا گیا ہے۔اسکولوں میں ان کمیٹیوں کے تحت کام کس طرح چل رہا ہے، اس کا جائزہ لینے کے لیے پولیس ہیڈ کوارٹر کی جانب سے اسکولوں کے دورے اور معائنے کیے جا رہے ہیں۔ اس سلسلے میں ڈاکٹر سید صاحب اور سارفڑے صاحب نے اسکول کا دورہ کیا اور تمام کمیٹیوں کے کام کاج کی جانچ کر کے خوشی کا اظہار کیا۔ اس موقع پر انہوں نے صدرمدرس، اساتذہ اور طلبا سے بات چیت کی، ان کے مسائل اور مشکلات کو جانا اور ان کے حل کے لیے مناسب اقدامات تجویز کیے۔ ساتھ ہی انہوں نے طلبا اور اسکول کے تحفظ کے لیے کن باتوں کا خیال رکھنا ضروری ہے، اس بارے میں تفصیلی رہنمائی بھی کی۔ تقریب کے اختتام پر اسکول کے صدرمدرس جناب شاہ طیب علی سر نے معزز مہمانوں کو شال اور گلدستہ پیش کر کے ان کا استقبال کیا اور بہترین رہنمائی کے لیے ان کا شکریہ ادا کیا۔