ترقیاتی کاموں کو رفتار دے کر معیاری خدمات فوری فراہم کریں: سرپرست وزیر اتُل ساوے

ناندیڑ:17؍اپریل ( نمائندہ اعتبار) ناندیڑ شہر میں ترقیاتی کاموں کو رفتار دے کر شہریوں کو بنیادی سہولیات بروقت فراہم کی جائیں۔ 100 دن کے ایکشن پروگرام کی ستائش کرتے ہوئے ہدایت دی گئی کہ معیاری خدمات مقررہ وقت میں فراہم کی جائیں، ڈیجیٹل کلاس رومز قائم کیے جائیں، خواتین کے لیے بیت الخلاء تعمیر کیے جائیں، بھارت رتن اٹل بہاری واجپئی کے مجسمہ کے مقام پر ان کی نظمیں آویزاں کی جائیں، شہر کی صفائی کے لیے ضرورت کے مطابق گاڑیوں اور عملہ میں اضافہ کیا جائے اور گھر گھر کچرا جمع کرنے کے نظام کو مکمل صلاحیت کے ساتھ نافذ کیا جائے۔ یہ ہدایات ریاستی وزیر برائے دیگر پسماندہ طبقات بہبود، دودھ ترقیات، غیر روایتی توانائی اور معذورین کو بااختیار بنانے کے وزیر اور ناندیڑ ضلع کے سرپرست وزیر اتُل ساوے نے دیں۔آج ضلع کلکٹر آفس میں میونسپل کارپوریشن کے 100 دن کے ایکشن پلان کا جائزہ لیا گیا۔ اس اجلاس میں میونسپل کارپوریشن کی جانب سے پیش کردہ 100 دن کے منصوبہ میں شامل مختلف کاموں اور بنیادی سہولیات سے متعلق امور پر تفصیلی گفتگو ہوئی۔ اس موقع پر میئر محترمہ کویتا سنتوش مولے، میونسپل کمشنر ڈاکٹر مہیش کمار ڈوئی پھوڑے، اسٹینڈنگ کمیٹی کے چیئرمین وریندر سنگھ گاڑی والے، قائدِ ایوان ایڈوکیٹ مہیش کدکدندے، سابق چیئرمین کشور سوامی، ایڈیشنل کمشنر گریش کدم، ایڈیشنل کمشنر نلیش سنکےوار، ڈپٹی کمشنر ابھیجیت وایکوس، ایس اجیت پال سنگھ سندھو، نتین گاڈھوے، سٹی انجینئر سمنت پاٹل سمیت مختلف محکموں کے آفیسران موجود تھے۔ناندیڑ شہر کے شہریوں کو 100 دن کے ایکشن پلان کے ذریعے معیاری خدمات مقررہ وقت میں فراہم ہوں، اس توقع کے ساتھ سرپرست وزیر نے اس منصوبہ کا تفصیلی جائزہ لیا۔ اس ایکشن پلان کے تحت گھر گھر صفائی، آفات میں کمی، ڈیپ کلیننگ، گوداوری ندی کو آلودگی سے پاک کرنا، پانی کی فراہمی کے نظام میں بہتری، جدید گیس شمشان گھاٹ، اہم چوراہوں کی خوبصورتی، بھارت رتن اٹل بہاری واجپئی کا مجسمہ نصب کرنا، خواتین کے لیے بیت الخلاء تعمیر کرنا، جدید ٹرانسپورٹ نظام، الیکٹرک چارجنگ اسٹیشن، خطرناک برقی تاروں کو زیر زمین منتقل کرنا، آر ٹی ایس کے تحت 74 خدمات کو آن لائن کرنا جیسے اقدامات شامل ہیں، جن کی وزیر نے تعریف کرتے ہوئے میونسپل کارپوریشن کے کام کی ستائش کی۔اس دوران اجلاس میں میونسپل کارپوریشن کے مختلف محکموں کی کارکردگی کا بھی جائزہ لیا گیا۔ شہر میں مجوزہ فلائی اوور پل، ٹریفک منصوبہ بندی، اسٹیڈیم کی تعمیر، ملٹی پارکنگ اور میونسپل اسکولوں کی جدید کاری جیسے موضوعات پر بھی گفتگو کی گئی۔شہر کے شہریوں کو معیاری خدمات مقررہ وقت میں فراہم ہوں، اس کے لیے ترقیاتی کاموں کو تیز کرنے کی ہدایت دیتے ہوئے کہا گیا کہ میونسپل کارپوریشن کا 100 دن کا ایکشن پلان ایک قابلِ ستائش اقدام ہے۔ شہر کی ترقی سے متعلق کاموں میں اگر کوئی رکاوٹ درپیش ہو تو اسے دور کرنے کے لیے حکومت کی سطح پر ضروری پیروی کی جائے گی، ایسا یقین سرپرست وزیر اتُل ساوے نے دلایا۔