اپانگ جنتا دل سماجی تنظیم کی جانب سے ضلع کلکٹر ڈاکٹر پروین کمار دیور کو خراجِ تحسین

ملکاپور :13/ اپریل: ( محمد احسان سر ) بلڈھانہ ،ضلع میں نئے تعینات ہونے والے ضلع کلکٹر ڈاکٹر پروین کمار دیور کی انسان دوست اور حساس طرزِ عمل کو سراہتے ہوئے اپانگ جنتا دل سماجی تنظیم نے انہیں خراجِ تحسین پیش کیا ہے. تفصیلات کے مطابق، ضلع کلکٹر کا چارج سنبھالنے کے بعد آج دیویانگ جنتا دل تنظیم کے ریاستی سکریٹری کلیم شیخ اپنے دیگر معذور ساتھیوں کے ہمراہ ملاقات کے لیے ضلع کلکٹر دفتر پہنچے۔ جیسے ہی ڈاکٹر دیور نے سی سی ٹی وی کے ذریعے ان کی آمد دیکھی، انہوں نے فوراً انہیں اپنے کیبن میں مدعو کیا اور خود باہر آکر ان کا استقبال کیا. اس موقع پر ضلع کلکٹر نے معذور افراد کو عزت دیتے ہوئے انہیں کرسی پر بٹھانے پر زور دیا اور ان کے ساتھ نہایت خوش اخلاقی سے پیش آئے۔ اس عمل کو حاضرین نے بے حد سراہا اور اسے ایک مثبت پیغام قرار دیا. بعد ازاں وفد کی جانب سے پیش کیا گیا گلدستہ ڈاکٹر دیور نے قبول کیا۔ ملاقات کے دوران انہوں نے کلیم شیخ کو اپنا ذاتی رابطہ نمبر بھی فراہم کیا اور یقین دہانی کرائی کہ ضلع کے معذور افراد سمیت تمام شہریوں کے مسائل کے حل کے لیے وہ ہر وقت دستیاب رہیں گے. اپانگ جنتا دل سماجی تنظیم نے ضلع کلکٹر کے اس رویے کو قابلِ تقلید قرار دیتے ہوئے امید ظاہر کی کہ ان کی قیادت میں ضلع بلڈھانہ میں عوامی مسائل کے حل کو ترجیح دی جائے گی.