ناندیڑ ضلع میں آج ووٹوں کی گنتی: لوک سبھا کے 19 اور اسمبلی کے 165 امیدواروں کیلئے فیصلہ کن دن

انتظامیہ مکمل تیار، یونیورسٹی کے نالج سینٹر میں ووٹوں کی گنتی ہوگی۔ کنوٹ، حدگاؤں اور لوہا تعلقہ میں مقامی سطح پر ووٹوں کی گنتی ہوگی
صبح 8 بجے سے گنتی شروع، پہلے راؤنڈ کے نتائج صبح 11 بجے تک متوقع

ناندیڑ:22؍نومبر ( نمائندہ اعتبار) ناندیڑ ضلع میں لوک سبھا اور اسمبلی انتخابات کی ووٹوں کی گنتی آج صبح 8 بجے سوامی رامانند تیرتھ مراٹھواڑہ یونیورسٹی ناندیڑ کے نالج سینٹر میں شروع ہوگی۔ نالج سینٹر کی پہلی اور دوسری منزل پر لوک سبھا اور اسمبلی کے ووٹوں کی گنتی ہوگی، جبکہ کنوٹ، حدگاؤں اور لوہا تعلقہ کے ووٹوں کی گنتی مقامی سطح پر ہوگی۔ پہلے راؤنڈ کے نتائج صبح 11 بجے تک متوقع ہیں۔ صبح کے وقت امیدواروں کی موجودگی میں سیکورٹی روم سے ووٹنگ مشینیں نکالی جائیں گی۔ اس کے بعد عملے کو رازداری کا حلف دلایا جائے گا اور گنتی کا آغاز ہوگا۔ ابتدا میں پوسٹل بیلٹ کی گنتی کی جائے گی۔ مجموعی طور پر 14 ٹیبلز پر گنتی کا عمل شروع ہوگا۔سوامی رامانند تیرتھ مراٹھواڑہ یونیورسٹی میں، پہلی منزل پر کمرہ نمبر 102 میں: بائیں ہال میں 85-بھوکر، درمیانی ہال میں 87-ناندیڑ جنوب، دائیں ہال میں 90-دیگلور اسمبلی حلقے کی گنتی ہوگی۔ کمرہ نمبر 106 میں: بائیں ہال میں 91-مکھیڑ، درمیانی ہال میں 89-نائیگاؤں، دائیں ہال میں 86-ناندیڑ شمالی حلقے کے ووٹوں کی گنتی ہوگی۔
لوک سبھا ضمنی انتخابات کی گنتی دوسری منزل پر کمرہ نمبر 206 میں ہوگی، جہاں بائیں ہال میں مکھیڑ، درمیانی ہال میں نائیگاؤں، اور دائیں ہال میں ناندیڑ شمال کے حلقوں کے ووٹوں کی گنتی ہوگی۔ کمرہ نمبر 202 میں: بائیں ہال میں بھوکر، درمیانی ہال میں ناندیڑ جنوبی، دائیں ہال میں دیگلور حلقے کے ووٹوں کی گنتی ہوگی۔لوک سبھا اور اسمبلی کی گنتی کے لیے مجموعی طور پر 1800ملازمین تعینات کیے گئے ہیں۔ ہر ٹیبل پر 4 افراد موجود ہوں گے، جن میں گنتی انسپکٹر، گنتی اسسٹنٹ، مائیکرو آبزرور اور ایک معاون شامل ہوگا۔ ہر اسمبلی کی گنتی 14 ٹیبلز پر ہوگی۔ لوک سبھا اور اسمبلی کے لیے 14 کو 6 سے ضرب دے کر کل 84 ٹیبلز کا انتظام کیا گیا ہے، جو لوک سبھا اور اسمبلی دونوں کے لیے یکساں رہیں گے۔ ووٹنگ مراکز کی تعداد کو 14 سے تقسیم کرکے گنتی کے راؤنڈز کی تعداد طے کی گئی ہے۔ اندازہ ہے کہ گنتی 24 سے 28 راؤنڈز میں مکمل ہوگی۔ہر راؤنڈ کی گنتی مکمل ہونے کے بعد مختلف مقامات پر نتائج کی تصدیق کی جائے گی، جس کے بعد الیکشن آفیسر نتائج کا اعلان کریں گے۔
کنوٹ اسمبلی حلقہ میں 331 ووٹنگ مراکز ہیں، جہاں 24 راؤنڈز ہوں گے۔ حدگاؤں میں 337 مراکز پر 25 راؤنڈز ہوں گے۔ بھوکّر میں 344 مراکز پر 25 راؤنڈز ہوں گے۔ ناندیڑ شمالی میں 359 مراکز پر 26 راؤنڈز ہوں گے۔ ناندیڑ جنوبی میں 312 مراکز پر 23 راؤنڈز ہوں گے۔ لوہا میں 338 مراکز پر 25 راؤنڈز ہوں گے۔ نائیگاؤں میں 350 مراکز پر 25 راؤنڈز ہوں گے۔ دیگلور میں 351 مراکز پر 26 راؤنڈز ہوں گے، جبکہ مکھیڑ میں 366 مراکز پر 27 راؤنڈز ہوں گے۔