جموں و کشمیر کے انتخابات تین مرحلوں میں، ہریانہ میں یکم اکتوبر کو ووٹنگ، 4 اکتوبر کو ووٹوں کی گنتی

نئی دہلی:16 اگستـ:جموں کشمیر اور ہریانہ کے اسمبلی انتخابات کا اعلان کر دیا گیا ہے۔ جموں و کشمیر میں تین مرحلوں میں انتخابات کرائے جائیں گے۔ انتخابات کا پہلا مرحلہ 18 ستمبر کو ہوگا۔ دوسرا مرحلہ 25 ستمبر کو ہوگا۔ تیسرے مرحلے کی ووٹنگ یکم اکتوبر کو ہوگی اور ووٹوں کی گنتی 4 اکتوبر کو ہوگی۔ یہاں تمام امیدواروں کو سیکورٹی فراہم کی جائے گی۔ اس کے ساتھ ساتھ تمام پولنگ سٹیشنوں کی سی سی ٹی وی کیمروں سے بھی نگرانی کی جائے گی۔ ہریانہ میں یکم اکتوبر کو تمام 90 اسمبلی سیٹوں کے لیے ووٹنگ ہوگی۔ یہاں بھی ووٹوں کی گنتی 4 اکتوبر کو ہوگی۔ یعنی جموں کشمیر اور ہریانہ اسمبلی کے لیے ڈالے گئے ووٹوں کے نتائج 4 اکتوبر کو ایک ہی دن آئیں گے۔ الیکشن کمیشن نے کہا کہ جموں و کشمیر میں کل 87.09 لاکھ ووٹر ہیں۔ ان میں 42 لاکھ 62 ہزار خواتین ووٹرز ہیں۔ مرد ووٹرز کی تعداد 44.46 لاکھ ہے۔ یہاں پہلی بار ووٹ ڈالنے والے نوجوان ووٹروں کی تعداد 3.71 لاکھ ہے۔ جبکہ مجموعی طور پر 20.7 لاکھ نوجوان ووٹر ہیں جن کی عمریں 20 سے 29 سال کے درمیان ہیں۔ ووٹر لسٹ کی تیاری کا کام جاری ہے۔ چیف الیکشن کمشنر راجیو نے کہا کہ امرناتھ یاترا 19 اگست کو ختم ہوگی اور حتمی ووٹر لسٹ 20 اگست کو تیار کی جائے گی۔ اس کی کاپی تمام سیاسی جماعتوں کو بھیجی جائے گی۔ جموں و کشمیر میں تقریباً 11,838 ووٹر مراکز قائم کیے جا رہے ہیں۔ یہ ووٹر مراکز کل 9169 مقامات پر بنائے جائیں گے۔ ان میں سے 9506 پولنگ اسٹیشن دیہی علاقوں میں بنائے جائیں گے۔ ہر پولنگ سٹیشن پر اوسطاً 735 ووٹرز ہیں۔ اس بار الیکشن کمیشن نے جموں و کشمیر میں 360 ماڈل پولنگ اسٹیشن بنانے کا فیصلہ کیا ہے۔ چیف الیکشن کمشنر نے کہا کہ جموں و کشمیر میں کل 90 اسمبلی سیٹیں ہیں۔ ان میں 74 جنرل، 9 ایس ٹی اور 7 ایس سی سیٹیں ہیں۔
انتخابات کا گزٹ نوٹیفکیشن امرناتھ یاترا کے اختتام کے اگلے دن 20 اگست کو کیا جائے گا۔ دہلی میں چیف الیکشن کمشنر راجیو کمار نے جمعہ کو ریاستی اسمبلی انتخابات کا اعلان کیا۔ چیف الیکشن کمشنر نے کہا کہ جموں و کشمیر کی جماعتوں نے سیکورٹی کے حوالے سے درخواست کی تھی۔ اس بات کو مدنظر رکھتے ہوئے فیصلہ کیا گیا ہے کہ ہر الیکشن لڑنے والے امیدواروں کو مناسب سیکیورٹی فراہم کی جائے گی۔ الیکشن کمشنر نے کہا کہ کشمیر میں انتخابات کے ساتھ ساتھ تہواروں کا بھی موسم ہے، پھلوں کا بھی موسم ہے، زعفران اور سیب کا بھی موسم ہے۔ الیکشن کمیشن کے مطابق جموں و کشمیر میں ہر پولنگ اسٹیشن سی سی ٹی وی کی نگرانی میں ہوگا۔ چیف الیکشن کمشنر راجیو کمار کے مطابق جموں و کشمیر اور ہریانہ کے ہر پولنگ اسٹیشن پر سی سی ٹی وی کا انتظام کیا جائے گا۔ حال ہی میں ختم ہونے والے لوک سبھا انتخابات کا ذکر کرتے ہوئے چیف الیکشن کمشنر نے کہا کہ جموں و کشمیر میں پولنگ اسٹیشنوں پر لگنے والی لمبی قطاریں جمہوریت کا شاندار منظر پیش کرتی ہیں۔ انتخابات کے دوران لگنے والی لمبی قطاریں صرف قطاریں نہیں تھیں بلکہ وہ عوام کے اعتماد کو ظاہر کرتی تھیں۔ ہر کوئی انتخابات میں جمہوری عمل میں شرکت کو یقینی بنانا چاہتا تھا۔