انقلاب آئے گا

نفرتوں کی بارشیں
سازشیں ہی سازشیں
جابجا ہیں وحشتیں
خون رنگ کاوشیں
ہر طرف ہیں دہشتیں
ہیں عجیب گردشیں
لگتا ہے جہان میں
انقلاب آئے گا

ہر کوئی نشانہ ہے
کیسا شاخسانہ ہے
خوف کا ٹھکانہ ہے
وقت تازیانہ ہے
آہ و غم ترانہ ہے
مضطرب زمانہ ہے
انقلاب آئے گا

نفرتیں عروج پر
ظلم بام اوج پر
جبر مہ جبین پر
خون آستین پر
بھیڑ ہے کمین پر
لگتا ہے زمین پر
انقلاب آئے گا

بے حسی مزاج میں
بے کلی رواج میں
روشنی علاج میں
ظلمتوں کے راج میں
قلب اختلاج میں
سب ہیں کام کاج میں
زیست کے خراج میں
انقلاب آئے گا

دستکیں عذاب کی
محفلیں شراب کی
دھڑکنیں شباب کی
راحتیں گلاب کی
اک حسین خواب کی
ہے گھڑی جواب کی
انقلاب آئے گا

تیغ بے نیام ہے
کاج ہے نہ کام ہے
اب توقتل عام ہے
الفتوں کی شام ہے
موت کا جو جام ہے
زندگی کے نام ہے
انقلاب آئے گا

ہر کوئی غلام ہے
خوب انتظام ہے
حق کا یہ پیام ہے
اس کا ہی نظام ہے
قصہ یہ تمام ہے
حاصلِ کلام ہے
انقلاب آئے گا

علیم اسرار