فون

ازقلم: محمد وسیم (لیکچرار،حنیفیہ اردو جونیئر کالج آف آرٹس اینڈ سائنس ہیورکھیڑ،اکولا۔مہاراشٹرا)

’’آپا، تم تیار رہو۔ میں لینے آ رہا ہوں۔‘‘

بشیر کچھ دیر سنتا رہا، پھر بولا، ’’نہیں، اب اس کے پاس نہیں رہنا تمہیں۔‘‘

اس نے فون جیب میں رکھا اور موٹر سائیکل کی چابی ڈھونڈنے لگا۔

باورچی خانے میں سکینہ نے آٹے کا تھال پرے سرکا دیا۔ صبح بشیر نے اس کی کلائی مروڑ دی تھی۔ اب ڈبے کا ڈھکن کھولتے ہوئے بھی درد ہوتا تھا۔

رانی اسکول سے لوٹی تو بستہ چارپائی پر رکھ کر ماں کے پاس آ بیٹھی۔

’’امّی، بھوک لگی ہے۔‘‘

’’ڈبا لے آ۔‘‘

رانی ڈبا لے آئی۔ سکینہ نے کھولنے کے لیے ہاتھ بڑھایا، پھر روک لیا۔

’’ابھی تک درد ہو رہا ہے؟‘‘

سکینہ نے صحن کی طرف دیکھا اور ہاتھ گود میں رکھ لیا۔

’’کھول لے، بیٹا۔‘‘

رانی نے ڈبا کھولا، ایک روٹی نکالی اور ڈبا ماں کی طرف سرکا دیا۔

بشیر کو چابی مل گئی تھی۔ دروازے کی طرف جاتے ہوئے اس نے دوبارہ فون نکالا۔

’’آپا، میں نکل رہا ہوں۔‘‘

رانی روٹی رکھ کر اٹھی اور اس کے پاس جا کھڑی ہوئی۔ بات ختم ہونے پر اس نے ہاتھ بڑھا دیا۔

’’ابّا، فون دیجیے۔‘‘

’’کس کو کرنا ہے؟‘‘

’’ماموں کو۔‘‘