نئی ممبئی میں ایکسپریس وے پر بس حادثہ، پانچ افراد ہلاک، 49 زخمی

ممبئی: 16 جولائی:ممبئی-پونے ایکسپریس وے پر نئی ممبئی کے علاقے میں کل رات ایک بس کے حادثے کا شکار ہونے سے پانچ افراد ہلاک اور 49 دیگر زخمی ہو گئے۔ زخمیوں میں سے سات سے آٹھ کی حالت نازک بتائی جاتی ہے یہ واقعہ پیر-منگل کی درمیانی شب کے قریب پیش آیا۔ بس میں سوار سبھی لوگ ڈومبیولی، نیلجے لودھا کے رہنے والے تھے۔ وہ بھگوان وٹھل کے درشن کے لیے پنویل سے پنڈھر پور جا رہے تھے۔ ایکسپریس وے پر بس ٹریکٹر سے ٹکرا گئی۔ بس میں 54 افراد سوار تھے۔ نئی ممبئی زون-2 کے ڈپٹی کمشنر وویک پنسارے نے بتایا کہ 45 زخمیوں کو ایم جی ایم اسپتال بھیجا گیا ہے جبکہ دیگر کو سرکاری اسپتال لے جایا گیا ہے۔ ڈاکٹروں نے پانچ افراد کی موت کی تصدیق کر دی ہے۔ سات سے آٹھ افراد شدید زخمی ہیں جبکہ دیگر زخمیوں کی حالت خطرے سے باہر ہے۔ تصادم اتنا شدید تھا کہ بس سیدھی سڑک سے اتر گئی۔ رات کو ہی ریسکیو کام کیا گیا اور بس کو بھی کرین کی مدد سے جائے وقوعہ سے ہٹا دیا گیا۔