ناندیڑ: دیوالی کی تعطیلات میں گھر چھوڑ کر جانے والے شہری احتیاط برتیں

ناندیڑ: 4 نومبر(نمائندہ اعتبار) دیوالی کے تہوار اور اسکولوں کی تعطیلات کے پیش نظر بڑی تعداد میں شہری اپنے اہلِ خانہ کے ساتھ آبائی مقامات یا سیاحتی مقامات کی سیر کے لیے بیرونِ شہر جاتے ہیں۔ ایسے میں بند مکانات پر چوروں کی نظر رہنے اور نقب زنی و چوری کی وارداتوں کا خدشہ بڑھ جاتا ہے۔ شہریوں کی دیوالی کی خوشیوں کو برقرار رکھنے اور ان کی املاک کی حفاظت کے پیش نظر ناندیڑ ضلع پولیس کی جانب سے خصوصی گشت (Patrolling) میں اضافہ کیا گیا ہے۔ ساتھ ہی شہریوں سے اپیل کی گئی ہے کہ وہ سفر پر روانہ ہونے سے قبل اپنے مکانات کی حفاظت کے لیے ضروری احتیاطی تدابیر اختیار کریں۔
پولیس سپرنٹنڈنٹ ڈاکٹر نیلابھ روہن کی جانب سے جاری کردہ اپیل میں کہا گیا ہے کہ تعطیلات کے دوران بند مکانات چوروں کے لیے آسان ہدف بن سکتے ہیں۔ کئی مرتبہ مکان کے باہر جمع ہونے والے اخبارات، دروازے پر نمایاں تالے اور سوشل میڈیا پر سفر کی تصاویر شیئر کرنے سے چوروں کو گھر خالی ہونے کی اطلاع مل جاتی ہے۔ اس لیے شہریوں کو چاہیے کہ وہ اپنی حفاظت کے حوالے سے خاص طور پر محتاط رہیں۔
گھر کی حفاظت کے لیے پولیس کی جانب سے اہم ہدایات:
1۔ قیمتی زیورات اور نقد رقم محفوظ مقام پر رکھیں: بیرونِ شہر جاتے وقت گھر میں سونے، چاندی کے زیورات اور بڑی مقدار میں نقد رقم نہ چھوڑیں، بلکہ انہیں بینک لاکر یا کسی محفوظ مقام پر رکھیں۔
2۔ دروازے پر لگے تالے کو نمایاں نہ ہونے دیں: باہر سے نظر آنے والا تالا اس بات کی نشاندہی کرسکتا ہے کہ مکان بند ہے۔ اس لیے مضبوط شٹر لاک یا انٹرلاکنگ سسٹم استعمال کریں، یا تالے کو پردے کی مدد سے نظروں سے پوشیدہ رکھنے کا انتظام کریں۔
3۔ پڑوسیوں اور پولیس کو اطلاع دیں: بیرونِ شہر روانہ ہونے سے قبل اپنے قابلِ اعتماد پڑوسیوں، سوسائٹی کے واچ مین، قریبی پولیس اسٹیشن یا بیٹ مارشل کو اپنے سفر کے بارے میں اطلاع دیں، تاکہ متعلقہ علاقے میں پولیس کی خصوصی نگرانی کا انتظام کیا جاسکے۔
4۔ گھر میں روشنی کا مناسب انتظام رکھیں: رات کے وقت مکان کو مکمل طور پر اندھیرے میں نہ رکھیں۔ ہال یا داخلی راستے میں ایک بلب روشن رکھیں اور گھر کے باہر بھی رات کے وقت مناسب روشنی کا انتظام کریں۔ اس کے علاوہ روانگی سے قبل دودھ اور اخبار کی ترسیل بند کروادیں، تاکہ گھر کے باہر ان کے جمع ہونے سے مکان خالی ہونے کا شبہ پیدا نہ ہو۔
5۔ سوشل میڈیا پر سفر کی تفصیلات شیئر نہ کریں: اہلِ خانہ کے ساتھ بیرونِ شہر جانے کی تصاویر، چیک اِن (Check-in) یا اسٹیٹس فیس بک، انسٹاگرام اور واٹس ایپ پر گھر واپس آنے تک شیئر کرنے سے گریز کریں۔
6۔ سی سی ٹی وی اور الارم سسٹم فعال رکھیں: مکان کے باہر اور سوسائٹی کے احاطے میں نصب سی سی ٹی وی کیمروں کی کارکردگی اور ان کے فعال ہونے کی تصدیق کریں۔ کیمروں کی لائیو نگرانی کا ایکسیس اپنے موبائل فون پر بھی رکھیں۔
۔ مشتبہ افراد پر نظر رکھیں: اپنی کالونی یا اپارٹمنٹ میں دن کے وقت بلاوجہ گھومنے والے اجنبی افراد، پھیری والوں یا مشتبہ سرگرمیوں پر نظر رکھیں۔ کسی بھی مشکوک شخص یا سرگرمی کی اطلاع فوری طور پر پولیس کو دیں۔
ناندیڑ پولیس کا خصوصی گشت اور ناکہ بندی میں اضافہ:
ناندیڑ ضلع پولیس نے واضح کیا ہے کہ شہریوں کی حفاظت کے لیے پولیس فورس 24 گھنٹے چوکس ہے۔ رات کے وقت گشت اور ناکہ بندی کو مزید سخت کردیا گیا ہے۔ پولیس انتظامیہ نے شہریوں سے اپیل کی ہے کہ وہ جاری کردہ احتیاطی ہدایات پر عمل کریں اور پولیس کے ساتھ تعاون کریں۔کسی بھی مشتبہ سرگرمی یا نقل و حرکت کی اطلاع ملنے پر شہری فوری طور پر پولیس ہیلپ لائن نمبر 112 پر رابطہ کریں یا قریبی پولیس اسٹیشن سے رجوع کریں۔پولیس سپرنٹنڈنٹ ڈاکٹر نیلابھ روہن نے شہریوں سے اپیل کی ہے کہ وہ دیوالی کی تعطیلات کے دوران اپنے گھروں اور املاک کی حفاظت کو اولین ترجیح دیں، تاکہ تہوار کی خوشیاں کسی ناخوشگوار واقعے سے متاثر نہ ہوں۔