اقلیتی تعلیمی اداروں کو بڑی راحت، اقلیتی درجہ سرٹیفکیٹ پر عائد پابندی ختم

ممبئی: 29؍اکتوبر(نامہ نگار اعتبار نیوز محمد سرور شریف پربھنی) مہاراشٹر حکومت نے ریاست کے اقلیتی تعلیمی اداروں کو بڑی راحت دیتے ہوئے مذہبی اور لسانی اقلیتی درجہ سرٹیفکیٹ جاری کرنے پر عائد پابندی ختم کرنے کا اہم حکومتی فیصلہ 29 اکتوبر 2026 کو جاری کیا ہے۔ اس فیصلے کے تحت اب اقلیتی درجہ سرٹیفکیٹ جاری کرنے کے لیے اقلیتی ترقیاتی محکمے کے ایڈیشنل چیف سکریٹری، پرنسپل سکریٹری یا سکریٹری کو مجاز اتھارٹی قرار دیا گیا ہے۔ اس فیصلے سے ریاست کے اقلیتی تعلیمی اداروں کے زیرِ التوا معاملات کو حل کرنے کی راہ ہموار ہوگی۔اقلیتی طبقے، اقلیتی تعلیمی اداروں اور طلبہ کو درپیش مختلف مسائل کے حل کے لیے اکھل بھارتیہ اردو شکشک سنگھ 11138 کے وفد نے تنظیم کے بانی ساجد نثار احمد کی قیادت میں اقلیتی ترقیاتی محکمے کی سکریٹری ڈاکٹر مادھوری کھوڑے سے اہم میٹنگ کی تھی۔ اس موقع پر ریاستی صدر عرفان انصاری اور ریاستی کارگزار صدر شوکت مہاتے، سید نبیل، ضلع صدر اقبال کونچالی، سمیت سمیت تنظیم کے نمائندوں نے اقلیتی تعلیمی اداروں کو درپیش مسائل پیش کرتے ہوئے اقلیتی درجہ سرٹیفکیٹ جاری کرنے پر عائد پابندی فوری طور پر ختم کرنے کا مطالبہ کیا تھا۔تنظیم کی جانب سے توجہ دلائی گئی تھی کہ اقلیتی درجہ سرٹیفکیٹ جاری نہ ہونے کی وجہ سے تعلیمی اداروں اور اساتذہ کو مختلف انتظامی مشکلات کا سامنا کرنا پڑ رہا ہے۔ وفد نے مطالبہ کیا تھا کہ سرٹیفکیٹ جاری کرنے کا عمل دوبارہ شروع کرکے زیرِ التوا درخواستوں کو ترجیحی بنیادوں پر نمٹایا جائے، تاکہ اقلیتی اداروں اور وہاں خدمات انجام دینے والے اساتذہ کو درپیش مشکلات دور ہوسکیں۔