ناندیڑ شہر میں تجاوزات اور غیر قانونی پارکنگ کے خلاف خصوصی مہم

ناندیڑ:27؍اکتوبر ( نمائندہ اعتبار) ناندیڑ شہر کی اہم سڑکوں پر بڑھتی ہوئی تجاوزات اور غیر قانونی طور پر گاڑیاں پارک کرنے کے باعث ٹریفک جام کے مسائل پیدا ہو رہے ہیں، جس سے عام شہریوں کو بڑی حد تک دشواریوں کا سامنا کرنا پڑ رہا ہے۔ اس پس منظر میں ناندیڑ کے پولیس سپرنٹنڈنٹ ڈاکٹر نیلابھ روہن کی رہنمائی میں شہر ٹریفک برانچ کی جانب سے تجاوزات کے خاتمے اور ٹریفک کو منظم رکھنے کے لیے خصوصی مہم چلائی جا رہی ہے۔اسی سلسلے میں 27 اکتوبر 2026 ءکو شہر ٹریفک برانچ کے پولیس انسپکٹر، ناندیڑ میونسپل کارپوریشن اور متعلقہ ٹیموں کے اشتراک سے خصوصی مشترکہ کارروائی کی گئی۔ یہ کارروائی وزیرآباد چوک سے ایس ٹی اوور بس اسٹینڈ تا ریلوے اسٹیشن، ہنگولی گیٹ سے کویتا یاتری نواس اور شیومندر سے راج کارنر تک کی اہم سڑکوں پر انجام دی گئی۔ اس مہم میں شہر ٹریفک برانچ کے افسران و اہلکاروں، آر سی پی (RCP) ٹیم اور ناندیڑ میونسپل کارپوریشن کی ٹیم نے حصہ لیا۔کارروائی کے دوران سڑکوں کے کنارے قائم تجاوزات کو ہٹایا گیا۔ اس کے علاوہ ہاتھ گاڑیوں، پھل فروشوں، عارضی دکانوں اور ٹریفک میں رکاوٹ پیدا کرنے والی دیگر چیزوں کو بھی ہٹایا گیا۔ اسی دوران غلط طریقے سے گاڑیاں پارک کرنے اور آمدورفت میں رکاوٹ پیدا کرنے کے معاملے میں 78 کیس درج کرتے ہوئے مجموعی طور پر 78 ہزار روپے جرمانہ وصول کیا گیا۔ٹریفک پولیس نے تمام شہریوں سے اپیل کی ہے کہ وہ عوامی سڑکوں پر تجاوزات قائم نہ کریں اور ایسی جگہوں پر گاڑیاں پارک کرنے سے گریز کریں جہاں ٹریفک میں رکاوٹ پیدا ہونے کا خدشہ ہو۔اس کے علاوہ والدین، طلبہ اور تمام شہریوں سے اپیل کی گئی ہے کہ وہ اپنے نابالغ بچوں کو گاڑی چلانے کی اجازت نہ دیں، تین افراد کے ساتھ دو پہیہ گاڑی پر سفر (ٹرپل سیٹ) نہ کریں اور ٹریفک کے تمام قوانین کی سختی سے پابندی کریں۔پولیس کے مطابق یہ خصوصی مہم آئندہ بھی باقاعدگی سے جاری رہے گی اور ٹریفک قوانین کی خلاف ورزی کرنے والوں کے خلاف سخت کارروائی کی جائے گی۔