فضول رسموں نے نکاح کو مشکل بنا دیا، سنتِ نبوی ﷺ کے مطابق نکاح آسان بنائیں: مولانا شعیب

میرٹھ، 22 اکتوبر (محبوب الحسن مظفرنگری)جمعیۃ علماء شہر میرٹھ حلقہ نمبر 14 کے زیرِ اہتمام گزشتہ روز بعد نمازِ مغرب زین المساجد، بیگم باغ، میرٹھ میں ’’آؤ! نکاح کو آسان بنائیں‘‘ مہم کے تحت اصلاحِ معاشرہ کا ایک اہم پروگرام منعقد ہوا۔ پروگرام کا مقصد نکاح کو سنتِ نبوی ﷺ کے مطابق آسان بنانے اور معاشرے میں رائج فضول رسم و رواج کے خاتمے کے لیے بیداری پیدا کرنا تھا۔پروگرام سے خطاب کرتے ہوئے مولانا شعیب، استاذ دارالعلوم میرٹھ، شاہی جامع مسجد نے احادیثِ مبارکہ اور صحابۂ کرام رضی اللہ عنہم کے واقعات کی روشنی میں نکاح کی اہمیت اور سنت کے مطابق نکاح کرنے کی برکات بیان کیں۔ انہوں نے کہا کہ نکاح کو آسان بنانا خوش گوار ازدواجی زندگی اور صالح معاشرے کی تشکیل کے لیے ضروری ہے۔ فضول خرچی، غیر ضروری اخراجات اور نت نئی رسموں نے نکاح کو مشکل بنا دیا ہے، جس کے باعث نوجوان لڑکے اور لڑکیوں کو پریشانیوں کا سامنا کرنا پڑتا ہے۔انہوں نے زور دیتے ہوئے کہا کہ معاشرے میں نکاح کو آسان بنانے کے لیے غیر ضروری رسموں کو ترک کرنا اور سنتِ نبوی ﷺ کو عام کرنا وقت کی اہم ضرورت ہے۔ جب تک معاشرے کے افراد سادگی کو اختیار نہیں کریں گے اور فضول اخراجات سے اجتناب نہیں کریں گے، اس وقت تک نکاح کو آسان بنانے کا مقصد پوری طرح حاصل نہیں ہوسکے گا۔پروگرام کے اختتام پر مفتی ذکاءالرحمن قاسمی، امام و خطیب زین المساجد، بیگم باغ، میرٹھ نے دعا کرائی، جس کے ساتھ پروگرام بحسن و خوبی اختتام پذیر ہوا۔اس موقع پر بازار اور محلے کے لوگوں نے جمعیۃ علماء شہر میرٹھ کی اصلاحی و سماجی خدمات کو سراہا۔ یہ پروگرام حلقہ نمبر 14 کی جانب سے اصلاحِ معاشرہ اور نکاح کو آسان بنانے کی مہم میں ایک اہم پیش رفت ثابت ہوا۔